पर्साको बहुरदरमाई नगरपालिका वडा नं. ८ रामनगरी टोलमा रहेको हाट बजारमा सेड संचालनमा आएको छ ।
विगत १५ वर्ष देखि अव्यवस्थित रहेको हाट बजारमा सेड सञ्चालन हुदाँ स्थानीय व्यापारीहरु हर्शित भएका छन् ।
पक्की ढलान र रङ्गरोगन गरी ६० फिट लम्बाई र २० फिट चौडाईको पक्की सेड संचालनमा आएपछि महुवन, विश्रामपुर, गर्दाैल, एकडरवा, फुलकौल लगायत आसपासका व्यापारी र उपभोक्तालाई फाईदा पुगेको छ ।
सेड नहुदाँ भुईमै राखेर किनबेच गरिरहेका व्यापारिहरुलाई सेड सञ्चालनमा आउँदा धुलो माटोबाट जोगिने वातावरण भएको स्थानीय राजेश प्रसादले बताए ।
उनले भने, सेड सञ्चालन हुदाँ उपभोक्ताले समेत स्वच्छ, सफा, गुणस्तरीय र ताजा तरकारी उपभोग गर्न सक्ने भएका छन् ।
प्रदेश सरकारको भूमि व्यवस्था तथा कृषि सहकारी मन्त्रालय अन्तर्गतको कृषि निर्देशनालय नेकटाझिझ धनुषाको ८५ प्रतिशत र सितलमाई कृषि सहकारी संस्थाको १५ प्रतिशतको आर्थिक सहयोगले कुल २२ लाखको लागतमा बजारमा सेड निर्माण गरिएको रामनगरी स्थ्ति सितलमाई कृषि सहकारी संस्थाका अध्यक्ष अरविन्द कुमार साहले बताए ।
सेढ निर्माणपछि तरकारी व्यवसायी संगै उपभोक्ताहरुको समेत चाप बढेको स्थानीय व्यवसायी रामेश्वर साहले बताए । उनले भने, पहिला सडकमै तरकारी बेच्दा बढिमा मुस्किलले एक क्वीन्टल मात्र विक्रि गर्न सकिन्थ्यो तर व्यवस्थित बजार संचालनमा आएपछि आसपासको उपभोक्ता समेत आउने गरेकाले हाल डेढ, २ क्वीन्टलसम्म तरकारी बिक्रि भईरहेको छ ।
