यही पुस १० गते काठमाडौंमा हुन लागेको मिस्टर नेपालको अडिशन वीरगंजमा सम्पन्न भएको छ । वीरगंज पब्लिक कलेजको सभाकक्षमा आयोजित अडिशनमा वीरगंज लगायत यस क्षेत्रका ९ जना युवाहरु छनौट भएका छन् । एक्सपोज डटकमको संयोजनमा शिवानी एयर प्रा.लि. ले आयोजना गर्न लागेको मिस्टर नेपाल २०१९ को लागि मुलुकको विभिन्न जिल्लामा अडिशन गरि युवाहरुलाई छनौट गर्ने कार्य भइरहेको छ ।
सोही क्रममा आइतबार वीरगंजमा अडिशन सम्पन्न भएको हो । अडिशनबाट वीरगंज तथा यस क्षेत्रका संजय गुप्ता, धनन्जय कुमार साह, पियुस गुप्ता, अभिनाश चौधरी, आनन्द कुमार गुप्ता, नविन गिरी, एम.डि. अजाम, आदित्य यादव, करण विश्वकर्मा तथा शुलभ चौधरी छनौट भएका हुन् । वीरगंजमा अडिशन सम्पन्न पश्चात चितवन, इटहरी, धनगढी, बुटवल, पोखरा तथा काठमाडौंमा अडिशन हुने आयोजक सँस्थाले जनाएको छ ।
वीरगंज स्थित नेशनल इभेन्ट एण्ड म्यानेजमेन्टले आयोजना गरेको अडिशनमा वीरगंज पब्लिक कलेजका निर्देशक डा. दीपक शाक्य, एक्सपोज डट नेपालका सि.ई.ओ. अर्चना थापा तथा रविराज श्रेष्ठले निर्णायक मण्डल (जज) को भूमिका निर्वाह गरेका थिए । कार्यक्रमलाई नेशनल इभेन्ट एण्ड म्यानेजमेन्टका राहुल सिंह राजपुत तथा रौनक गुप्ताले संयोजन गरेका थिए ।
विभिन्न जिल्लाबाट युवाहरुलाई छनौट गरि काठमाडौंमा १ महिनासम्म विभिन्न विधामा तालिम दिई पुस १० (२६ डिसेम्बर २०१९) को दिन आयोजना हुने फाइनल राउण्डमा प्रतिस्पर्धीहरुलाई सहभागी गराइने आयोजक सँस्थाले जनाएको छ ।
