सुख्खा बन्दरगाह संचालनको टेण्डर प्रक्रिया टुंगियो

स्थानिय

गृहपृष्ठ
स्थानिय
सुख्खा बन्दरगाह संचालनको टेण्डर प्रक्रिया टुंगियो

सुख्खा बन्दरगाह संचालनको टेण्डर प्रक्रिया टुंगियो

नेपाललाई भारतसँग जोड्ने एकमात्रा रेलमार्ग वीरगन्ज स्थित सुख्खा बन्दरगाह संचालनको लागि टेण्डर प्रक्रिया टुंगिएको छ । आ.व. २०७७/०७८ देखि आगामी पाँच वर्षको लागि सुख्खा बन्दरगाह संचालनको जिम्मा भारतको न्यू दिल्ली स्थित प्रिस्टाइन मेगा लोजिस्टिक पार्क प्रा.लि.ले पाएको छ ।

विगत ५ महिना अगाडि २०७६ मंसिर २४ गते सुख्खा बन्दरगाह संचालन गर्ने नेपाल सरकार उद्योग वाणिज्य तथा आपूर्ति मन्त्रालय अन्तर्गतको नेपाल इन्टरमोडेल यातायात विकास समितिले आह्वान गरेको टेण्डर प्रक्रियाबाट प्रिस्टाइन मेगा लोजिस्टिक पार्क प्रा.लि.ले आगामी ५ वर्षको लागि सुख्खा बन्दरगाह संचालनको लागि ठेक्का साकार गरेको छ । उक्त कम्पनीले ३ अर्व ३३ करोड रकम कबोल गरेपछि सुख्खा बन्दरगाह संचालनको ठेक्का प्रिस्टाइन प्रा.लि. ले पाउने भएको हो ।

सुख्खा बन्दरगाह संचालन गर्ने क्रममा प्रिस्टाइनले नेपाल इन्टरमोडेल यातायात विकास समितिलाई प्रत्येक वर्ष पाँच किस्ता मार्फत रकम भुक्तानी गर्ने सहमति भएको छ । पहिलो वर्ष ३३ करोड, दोश्रो वर्ष ४० करोड, तेश्रो वर्ष ५३ करोड, चौथो वर्ष ६७ करोड तथा पाँचौ वर्ष ८२ करोड भुक्तानी गर्ने सहमति भएको नेपाल इन्टरमोडेल यातायात विकास समिति (आई.सि.डि.) वीरगन्जका प्रमुख कमल ज्ञवालीले बताए । सुख्खा बन्दरगाह ठेक्का लगाउनका लागि टेण्डर आह्वान गरिएपछि नेपालका एक वटा तथा भारतका चार वटा कम्पनीले प्रतिस्पर्धा गरेको थियो ।

टेण्डर प्रतिस्पर्धामा नेपालका हाइवे जगदम्बा जे.वि. तिनकुने काठमाडौं तथा भारतका प्रिस्टाइन मेगा लोजिस्टिक पार्क प्रा.लि., न्यू दिल्ली, कन्टेनर कर्पोरेशन अफ इन्डिया (कोनकर) मातहतका हिमालय टर्मिनल प्रा.लि., आदानी लोजिस्टिक लि. गुजरात तथा इन्टरनेशनल कार्गो टर्मिनल एण्ड इन्फास्टक्चर प्रा.लि. महाराष्ट्रले भाग लिएका थिए । प्रतिस्पर्धाको क्रममा सबैभन्दा अग्र स्थानमा रहेको प्रिस्टाइन मेगा लोजिस्टिक पार्क प्रा.लि.ले ३ अर्व ३३ करोड रकम कबोल गरेको थियो भने दोश्रो स्थानमा रहेको हिमालय टर्मिनलले २ अर्व ८१ करोड ९० लाख रकम कबोल गरेको थियो ।

विगत १५ वर्षदेखि सुख्खा बन्दरगाह संचालन गर्दै आएको (कोनकर) कन्टेनर कर्पोरेशन अफ इन्डिया मातहतका हिमालय टर्मिनल भने यस पटकको टेण्डरमा दोश्रो स्थानमा परेको छ । हिमालय टर्मिनलले कबोल गरेका रकम भन्दा लगभग ५० करोड बढि रकम प्रिस्टाइनले कबोल गरेपछि सुख्खा बन्दरगाह संचालनको ठेक्का पाएको हो । यसरी नै तेश्रो स्थानमा रहेको आदानी लोजिस्टिक लि. ले २ अर्व ८० करोड ६० लाख रकम कबोल गरेको थियो भने चौथो स्थानमा रहेको हाइवे जगदम्बा जे.वि. तिनकुने काठमाडौंले २ अर्व ४६ करोड रकम कबोल गरेको थियो ।

यसरी नै पाँचौ स्थानमा रहेको इन्टरनेशनल कार्गो टर्मिनल एण्ड इन्फास्टक्चर प्रा.लि. महाराष्ट्र भारतले २ अर्व ४४ करोड ५० लाख रकम कबोल गरेको थियो । सुख्खा बन्दरगाह संचालनका लागि नेपाल सरकार उद्योग वाणिज्य तथा आपूर्ति मन्त्रालय अन्तर्गतका नेपाल इन्टरमोडेल यातायात विकास समितिले न्यून्तम २ अर्व ४० करोड रकम माग दाबी गरेको थियो । विगत १५ वर्षदेखि सुख्खा बन्दरगाह संचालन गर्दै आएको हिमालय टर्मिनलको म्याद यही असार २२ गते सकिँदैछ ।