फिफा विश्वकप २०२२ को खेल मिति घोषणा, नेपाली दर्शकलाई सहज

खेलकुद

गृहपृष्ठ
खेलकुद
फिफा विश्वकप २०२२ को खेल मिति घोषणा, नेपाली दर्शकलाई सहज

फिफा विश्वकप २०२२ को खेल मिति घोषणा, नेपाली दर्शकलाई सहज

दुई बर्षपछि एसियाली राष्ट्र कतारमा हुन गईरहेको बहुप्रतिष्ठित फिफा विश्वकप २०२२ को खेल आयोजना हुने मिति घोषणा गरिएको छ ।

विश्व फुटबलको सर्वोच्च निकाय फिफाले बुधबार प्रतियोगिताको खेल मिति घोषणा गरेको हो । १८ बर्षपछि फेरि एसियामा फर्किएको फुटबलको महाकुम्भमेला सन् २०२२ को २१ नोभेम्बरदेखि शुरु हुने भएको हो ।

स्मरण रहोस, यसअघि पहिलोपटक सन् २००२ मा जापान–दक्षिण कोरियाले संयुक्त रुपमा फिफा विश्वकपको सफलताका साथ आयोजना गरेका थिए । यद्यपि मध्य–पूर्वी एसियामा फिफा विश्वकप हुन लागेको यो नै पहिलो पटक हुनेछ । कतारको विभिन्न आठ शहरहरुमा हुन गईरहेको प्रतियोगिताको फाइनल खेल भने १८ डिसेम्बरका दिन हुनेछ । उद्घाटन खेलमा आयोजक कतारको खेलसँगै प्रतियोगिताको २२औं संस्करण शुरु हुनेछ ।

फिफाका अनुसार प्रतियोगिताको समूह चरणका खेलहरु हुँदासम्म प्रत्येक दिन चार खेलहरु हुने बताइएको छ । योसँगै समूह चरणका खेलहरु १२ दिनमै सम्पन्न हुनेछन् । जसले गर्दा नकआउट चरणमा पुगेका टोलीहरुलाई प्रर्याप्त आराम गर्न समय पुग्ने बताइएको छ ।

प्रतियोगिताको तेस्रो स्थानका लागि हुने प्ले अफ म्याच १७ डिसेम्बरका दिन दोहा स्थित खलिफा इन्टरनेशनल स्टेडियममा हुनेछ । त्यस्तै फाइनल म्याच भने १८ डिसैम्बरका दिन अर्को महत्वपुर्ण शहर लुसैल स्थित लुसैल स्टेडियममा हुनेछ । स्टेडियमको दर्शक क्षमता ८० हजार रहेको बताइएको छ ।

प्रतियोगिताको महत्वपुर्ण पक्ष भनेको विश्वकपको इतिहास मै कतार विश्वकप पहिलोपटक जाडो मौसममा हुने तय भएको छ । यसअघि सम्पन्न भएका प्रतियोगिताहरु गर्मी मौसममा हुँदै आएका थिए । त्यस्तै फिफाले प्रतियोगिताको टिकट बिक्री सर्वसाधारणका लागि अनलाईनमार्फत आउने दिनहरुमा खुला गर्ने र त्यसबारे जानकारी समेत दिने स्पष्ट पारेको छ ।

नेपाली दर्शकहरुलाई पनि सहज

यसअघिका हरेक जसो विश्वकपका खेलहरु मध्यरातमा वा रातीको समयमा हेर्नुपर्ने नेपाली फुटबल समर्थकहरुलाई कतार विश्वकपका बेला भने सहज हुने भएको छ ।

कतारको स्थानीय समयअनुसार खेलहरु हुँदा नेपालमा त्ष्यति सारो रात नपर्ने भएकाले नेपाली फुटबल समर्थकहरुले कतार विश्वकपतर्फका सबैजसो खेलहरु सहज रुपमा हेर्न पाउने अनुमान गरिएको छ । - एजेन्सी