कोरोना अपडेट : पछिल्लो एक हप्तामा ६३ जनाको मृत्यु

स्थानिय

गृहपृष्ठ
स्थानिय
कोरोना अपडेट : पछिल्लो एक हप्तामा ६३ जनाको मृत्यु

कोरोना अपडेट : पछिल्लो एक हप्तामा ६३ जनाको मृत्यु

स्वास्थ्य तथा जनसंख्या मन्त्रालयले बिहीबार सार्वजनिक गरेको तथ्यांक अनुसार पछिल्लो २४ घण्टामा कोभिड-१९ बाट १७ जनाको मृत्यु भएको छ । योसँगै नेपालमा कोरोनाभाइरस संक्रमणबाट मृत्यु हुनेको संख्या ४५३ पुगेको छ ।

बिहीबारसम्ममा मुलुकमा कोरोना संक्रमित हुनेको संख्या ६९ हजार ३०१ पुगेको छ । यीमध्ये पछिल्लो २४ घण्टामा मात्र १ हजार ४९७ कोरोना संक्रमित थपिएका छन् । पछिल्ला दिनमा कोरोना संक्रमितको संख्या बढेसँगै मृत्यु हुनेहरूको संख्या पनि बढ्दो छ ।

बुधबारको तथ्यांक अनुसार पछिल्लो २४ घण्टामा कोरोना संक्रमणबाट मृत्यु हुनेको संख्या ७ थियो भने मंगलबार दुई जनाको मात्र कोरोना संक्रमणबाट मृत्युको भएको थियो ।

मुलुकमा कोरोनाबाट मृत्यु हुनेको संख्या ४ असोजसम्ममा ४११ र ३ असोजसम्ममा ४०१ थियो । स्वास्थ्य मन्त्रालयले सार्वजनिक गरेको तथ्यांक अनुसार २ असोजसम्ममा ३९० जना कोरोना संक्रमितको मृत्यु भएको थियो ।

यसरी एक सातामा कोरोना संक्रमणबाट ६३ जनाको मृत्यु भएको छ । संक्रामक रोग तथा आईसीयू विशेषज्ञ डा. प्रभात अधिकारी होम आइसोलेसनमा बसिरहेका बेला, अस्पताल जाने क्रममा, आईसीयू बेड नपाएर र आईसीयू बेडमा पुगे पनि राम्रो सेवा नपाएका कारण संक्रमितको ज्यान गएको बताउँछन् ।

“यसलाई कम गर्न घरमा भएका संक्रमितलाई सरकारले दैनिक निगरानीमा राख्नुपर्छ,” डा. अधिकारी भन्छन्, “उपचारमा खट्ने चिकित्सकहरूलाई तालिमसहित अक्सिजन भएको बेडको व्यवस्थापन गर्न जरुरी भइसकेको छ ।”

उनी सरकारले परीक्षण दर अझै बढाउनुपर्ने र लुकेर रहेका कोरोना संक्रमित पहिचान गर्न कट्याक्ट ट्रेसिङलाई प्रभावकारी बनाउनुपर्ने बताउँछन् । - हिमालखबरबाट साभार गरिएको