विना विकल्प ट्राफिक व्यवस्थापन थाल्दा झन अव्यवस्थित बन्दै

स्थानिय

गृहपृष्ठ
स्थानिय
विना विकल्प ट्राफिक व्यवस्थापन थाल्दा झन अव्यवस्थित बन्दै

विना विकल्प ट्राफिक व्यवस्थापन थाल्दा झन अव्यवस्थित बन्दैफुटपाथमा सवारी, सडकभरी बटुवा

ट्राफिक व्यवस्थापन गर्न भन्दै वीरगन्ज महानगरभित्रका सडक छेउमा फ्लामे सिक्रि लगाएको कारण ट्राफिक झनै अव्यवस्थित बन्दै गएको छ । वीरगन्ज महानगरपालिका, नेपाल प्रहरी तथा ट्राफिक प्रहरीको समन्वयमा वीरगन्ज महानगरभित्र रहेका सडकका छेउमा सिक्रि लगाइएका कारण जथाभावी सवारी पार्किङ्ग हुन थाले पछी यस्तो समस्या देखिएको हो ।

ट्राफिक व्यवस्थापनका लागि सडक छेउमा बनाईएको लेन हटाएर महानगरपालिकाले आदर्शनगर स्थित पुरानो बसपार्कमा सवारी पार्किङ्ग गर्ने व्यवस्था गरेको छ । तर पार्कींङ्गस्थलबाट बजार ठाढा पर्ने, त्यसमाथी सवारी पार्किङ्ग र सुरक्षाको व्यवस्था नभएका कारण फुटपाथमै सवारी पार्किङ्ग र्भरहेको छ । यसकारण सडक अस्तव्यस्त बनेको छ भने फुटपाथ बाट हिँड्ने सर्वसाधारणलाई समेत समस्या भइरहेको छ ।

वीरगन्जको घण्टाघरदेखि माइस्थान चोकसम्म र आदर्शनगर चोकदेखि कैलाश चोकसम्म सिक्री लगाईएको भए पनि त्यसको कुनै विकल्प नदिएको कारण सर्वसाधारण देखि व्यापारी सम्मले आफ्नो सवारी फुटपाथमा पार्किङ्ग गरि रहेका छन् । ट्राफिक व्यवस्थापनको नाममा लगाइएको फुलामे सिक्रि भित्रको स्थानको सुरक्षा एवं सदुपयोग छैन भने अर्कोतिर आम नागरिकहरु जोखीम मोलेर सडकमा हिँड्न बाध्य छन् ।

विगतमा लामै समय सवारी पार्कींङ्ग गरीएको स्थानमा सिक्रीले घेरेर पार्कींङ्ग रोकेको कारण सबैलाई समस्या परेको भन्दै स्थानिय व्यापारी आक्रोसित बनेका छन् । सवारी पार्किङ्ग फुटपाथमा र सर्वसाधारणहरु सडकमा हिँड्ने उल्टो कार्य गराएर प्रहरी तथा महानगरपालिकाले दुःख मात्रै दिएको विरगन्ज आदर्शनगरका स्थानीय व्यापारी मोहन शर्माको गुनासो छ । सिक्री लगाएर ट्राफिक व्यवस्थापन हुनुको सट्टा झन ट्राफिक अव्यस्थित भएको उनको तर्क छ ।

उचित विकल्प नदिएरै महानगरपालिकाले नियम लागु गरेकोले ठाउँको सदुपयोग तथा ट्राफीक व्यवस्थापन दुबै कार्यमा असफल भएको भन्छन् ग्रिनसिटि सामुदायिक प्रहरी तथा सामुदायिक सेवा केन्द्र आदर्शनगरका अध्यक्ष जयप्रकाश खेतान । यसमा बसपार्क स्थित पार्किङ्गको ठेक्का पट्टा पाएको ठेकेदार पनि दोषी रहेको भन्दै अध्यक्ष खेतानले राम्रो उद्देश्यले गरेको कार्यको उल्टो प्रभाव परेको बताए ।

स्थानीय व्यापारी सचिन अग्रवालका अनुसार फलामे सिक्री लगाएको कारण व्यापार व्यावसायमा पनि समस्या परेको छ । उनी भन्छन् “किनमेलका लागि ग्राहकहरु पुरानो बसपार्कमा सवारी पार्किङ्ग गरेर एक डेढ किलोमिटर पैदल हिँडेर पसलसम्म आउनै चाहँदैनन् ।” दिनहुँ मोटरसाइकल चोरी हुने गरेको अवस्थामा सुरक्षा र व्यवस्थित पार्किङ्गको अभावले सर्वसाधारणले आफुलाई पायक पर्ने फुटपाथमा पार्कींङ्ग गर्नुपरेको जसकारण व्यापारी, ग्राहक साथमा ट्राफीक व्यवस्थापन कर्तालाई समेत समस्या भैरहँदा पार्किङ्ग स्थललाई सिक्रीले घेरेर राख्नुको अर्थ रहला र ? भनेर प्रश्न गर्दै अग्रवालले यसतर्फ सम्बन्धित निकायको ध्यान जान जरुरी रहेको बताए ।