प्रहरीले दोषीलाई कारवाहीको सट्टा बचाउ गरेको पिडितको आरोप

स्थानिय

गृहपृष्ठ
स्थानिय
प्रहरीले दोषीलाई कारवाहीको सट्टा बचाउ गरेको पिडितको आरोप

प्रहरीले दोषीलाई कारवाहीको सट्टा बचाउ गरेको पिडितको आरोपप्रहरी भन्छ ‘दुवै पक्षको जाहेरी आयो, अनुसन्धान चल्दै छ’

कुटपिटबाट गम्भीर घाइते बनाएकाहरु विरुद्ध किटानी जाहेरी दिंदा पनि प्रहरीले घटनामा संलग्नलाई कारवाही नगरेको पिडित पक्षले आरोप लगाएका छन् । नेपाल पत्रकार महासंघ पर्साको सभाहलमा आज पत्रकार सम्मेलनको आयोजना गरी पिडित राकेश साह र रमेश पासवानले यस्तो आरोप लगाएका हुन् ।

वीरगंज महानगरपालिका वडा नं.२३ प्रसौनी बिर्ताका केहि युवाहरुको कुटपिटबाट गम्भीर घाइते एक बालिका सहित ५ जनाको उपचार जारी रहेको अवस्थामा वडा प्रहरी कार्यालय श्रीपुरमा पिडक विरुद्ध किटानी जाहेरी दिए पनि कारवाहीको लागि कुनै चासो नदेखाएको उनीहरुको भनाई छ । पत्रकार सम्मेलनमा जानकारी गराइएको घटना बिवरण अनुसार गत असोज १३ गते बिहान ८ः३० बजे रमेश पासवानका छोरा अजय पासवानलाई बाटोमा कुटपिट गरिरहेको देखेपछि सुजित साहले झगडा छुट्याएका थिए ।

त्यसको केहि समय पछि वीरगंज २३ प्रसौनी बिर्ताका ईमरान अंसारी, ईरफान अंसारी, खुरसिद अंसारी, नुरसिद अंसारी, ग्यासुदिन मियाँ, मनिफ अंसारी र कमरोदा अंसारी सहितको समुहले स्थानिय राकेश साहको घरमा प्रवेश गरी कुटपिट गरेका थिए । कुटपिटबाट तिन बर्षकि छोरी आरुषि साह, भाई सुजित साह, आमा धर्मशिला देवी स्थानिय अजय पासवान र निरज श्रेष्ठ गम्भिर घाइते भएको राकेश साहले जानकारी दिए ।

गम्भिर घाईते मध्ये धर्मशिला देवी र सुजित साहको वीरगंज न्युरो हस्पिटल पानी टंकी र अजय पासवानको सुर्य हस्पिटलमा उपचार भईरहेको जनाइएको छ । घटना लगत्तै कुटपिट गर्ने बिरुद्ध जाहेरी दिंदा समेत प्रहरीले जाहेरी नलिई थप पिडा दिने काम गरेको पीडित राकेश साहले बताए ।

वडा प्रहरी कार्याल श्रीपुरका प्रहरी निरिक्षक दिपक साहले पक्राउ गरेका चार जनालाई समेत छोडेर पिडकलाई उन्मुक्ति दिने काम गरेको पिडित साहले बताए । पिडितको उपचार भईरहेको बेला आक्रमण गर्नेलाई उन्मुति दिई घटना दवाउन प्रहरीे नै सक्रिय रहेर दोषीलाई उन्मूक्ति दिने र निर्दोषलाई झन त्रसित बनाउने काम हुनुले न्यायको आश सेलाएको भन्दै पिडितपक्षले पत्रकार सम्मेलनमा गुनासो पोखे ।

आगामी असोज १८ गते आईतबार सम्म प्रहरीले जाहेरी नलिए स्थानीय न्यायका पक्षधरको बीचमा जाने र सडक आन्दोलन गर्ने सम्मको चेतावनी समेत पीडित रमेस पासवानले दिएका छन । पत्रकार सम्मेलन लगत्तै आरोपबारे सोध्दा दुवै पक्षले एकअर्का विरुद्ध जाहेरी दिएको तर दर्ता गर्न बाँकी रहेको प्रहरीले जनाएको छ ।

१२ गते राती विवाहमा नाचका विषयलाई लिएर सामान्य विवाद भएकोमा भोलीपल्ट सोहि विषयलाई लिएर दुवै पक्ष विच झडप हुँदा एक पक्षलाई चोटपटक लागेको पाइएपछी दुइ तर्फी जाहेरीलाई मध्ये नजर गरी तारेखमा छोडीएको जिल्ला प्रहरी कार्यालय पर्साका प्रवक्ता डिएसपी मञ्जित कुँवरले जानकारी दिए । घटनाबारे वृस्तित अनुसन्धान हुँदै गरेको र दोषीलाई कारवाही गर्न पर्सा प्रहरी नचुक्ने उनले बताए ।