स्थानिय

गृहपृष्ठ
स्थानिय
एकजना कर्मचारीमा कोरोना संक्रमण पुष्टि भएपछि यातायात कार्यालयको सम्पूर्ण सेवा नै बन्द

एकजना कर्मचारीमा कोरोना संक्रमण पुष्टि भएपछि यातायात कार्यालयको सम्पूर्ण सेवा नै बन्द

वीरगन्ज स्थित यातायात व्यवस्था कार्यालय वीरगन्ज, सवारी चालक अनुमति पत्र शाखाले आइतबारदेखि अनिश्चितकालका लागि कार्यालय बन्द गरेको छ ।

कार्यालयमा कार्यरत एक जना कर्मचारीलाई कोरोना संक्रमण पुष्टि भएपछि सार्वजनिक सूचना नै जारी गरि अर्को सूचना नआउन्जेल यस कार्यालयबाट प्रवाह गरिने सम्पूर्ण सेवाहरु अनिश्चितकालका लागि बन्द गरेको जनाएको छ ।

यातायात व्यवस्था कार्यालय वीरगन्ज, सवारी चालक अनुमतिपत्र शाखाले जारी गरेको सार्वजनिक सूचनामा यस कार्यालयमा कार्यरत एक जना कर्मचारीको कोरोना संक्रमण पुष्टि भएकोले निजको सम्पर्कमा रहेका अन्य कर्मचारीहरुलाई सेल्फ आईसुलेशनमा बस्नुपर्ने भएकोले सेवाग्राहीको सुरक्षाको मध्यनजर गरि मिति २०७७ असोज २५ गते आइतबारदेखि अर्को सूचना नभएसम्मको लागि यस कार्यालयबाट प्रवाह गरिने सम्पूर्ण सेवाहरु बन्द गरिने व्यवहोरा सम्बन्धित सबैको जानकारीको लागि सूचित गरिन्छ, यसबाट सेवाग्राहीहरुमा पर्न गएको असुविधाप्रति कार्यालय क्षमाप्रार्थी छ भनेर उल्लेख गरिएको छ ।

उक्त सूचनाको बोद्धार्थ भौतिक पूर्वाधार विकास मन्त्रालय, प्रदेश नं. २ जनकपुर तथा जिल्ला प्रशासन कार्यालय पर्सा, वीरगन्जलाई पठाइएको छ । कोरोना संक्रमण महामारीको बखत भीडभाडलाई नियन्त्रण नगरि एक जना कर्मचारीको कोरोना संक्रमण पुष्टि हुँदैमा सम्पूर्ण कार्यालय नै बन्द गर्नु न्यायोचित नरहेको स्थानीयहरुको भनाई छ ।

यस्तो बेला झन सेवा बढि दिएर भीडभाडलाई नियन्त्रण गर्नुपर्नेमा सेवालाई प्रभावकारी नबनाई सेवाग्राहीलाई भीडभाड गर्न लगाई सेवा प्रवाह गरि रहेको यातायात व्यवस्था कार्यालयले अब सेवा बन्द गरे सेवाग्राही मर्कामा पर्ने बताए ।

कोरोना संक्रमण महामारीले ६ महिनाभन्दा बढि घरमै बसेर तलब बुझेका यस्ता कर्मचारीहरुले एउटा बहाना मात्रै पाए पुनः घरमै बसेर तलब बुझ्ने सोचमा रहेको स्थानीय बुद्धिजीवीहरुको भनाई छ ।