राष्ट्रिय

गृहपृष्ठ
राष्ट्रिय
कोरोना महामारीबीच जनता समाजवादी पार्टीको भव्य पार्टी प्रवेश

कोरोना महामारीबीच जनता समाजवादी पार्टीको भव्य पार्टी प्रवेशभेला नगर्न भन्दा भन्दै कार्यक्रम गरियो : प्रजिअ तामाङ्ग

कार्यक्रममा उपस्थित राष्ट्रिय नेताहरु । तस्बिरहरु : प्रणय साह/मध्य नेपाल

कोरोना महामारीका बीच एक ठाउँमा भेला नहुने भनेर पटक पटक प्रशासनले सूचना जारी गरि रहँदा पर्साको दुई स्थानमा जनता समाजवादी पार्टीको भव्य पार्टी प्रवेश तथा शुभकामना आदान प्रदान कार्यक्रम सम्पन्न गरेको छ ।

जनता समाजवादी पार्टीका केन्द्रिय नेताहरुको उपस्थितिमा सोमबार सयौं सर्वसाधारणहरुको उपस्थितिमा पर्सा जिल्लाको पटेर्वासुगौली गाउँपालिकाको महुवन र सखुवाप्रसौनी गाउँपालिकाको औराहामा भव्य पार्टी प्रवेश कार्यक्रमको सम्पन्न भएको छ । पार्टी प्रवेश कार्यक्रममा करिब १ हजार व्यक्तिले विभिन्न पार्टी परित्याग गरि समाजवादी पार्टीमा प्रवेश गरेका थिए ।

जिल्ला प्रशासन कार्यालय पर्साले कोरोना संक्रमणको महारीलाई मध्यनजर गर्दै पटक पटक सूचना जारी गर्दै एक ठाउँमा भेला गर्नमा रोक लगाएको छ । यहाँसम्म कि आउँदो दशैंलाई मध्यनजर गर्दै वीरगन्जमा दुर्गा माताको मुर्ति बनाउन, पण्डाल बनाउन, मेला लगायत तथा बलि दिनमा रोक लगाएको छ । गत भदौ महिनासम्म कोरोना ‘हटस्पट’ को रुपमा रहेको वीरगन्जमा भदौ यता संक्रमितहरुको संख्या कमि भएपनि कोरोना संक्रमणको जोखिम कायमै रहेको भन्दै विभिन्न नियमहरु लागु गरि रहेको छ तर यत्रो भव्य भेला आयोजना गर्नमा भने प्रशासनले रोक लगाउन सकेन ।

कार्यक्रममा उपस्थित स्थानीयहरु ।

प्रशासनले रोक्दा रोक्दै पनि भव्य पार्टी प्रवेश कार्यक्रमको आयोजना गरियो । पार्टी प्रवेश गर्नेहरुलाई जसपाका कार्यकारिणी अध्यक्ष उपेन्द्र यादव, पूर्व प्रधानमन्त्री एवं पार्टीका बरिष्ठ नेता बाबुराम भट्टराई, प्रदेश २ का मुख्यमन्त्री लालबाबु राउत गद्दी लगायतका नेताहरुले स्वागत गर्दै पार्टी प्रवेश गराएका थिए । पार्टी प्रवेश कार्यक्रमलाई सम्बोधन गर्दै पूर्व प्रधानमन्त्री एवं जसपाका बरिष्ठ नेता बाबुराम भट्टराईले कृषि क्षेत्रलाई आधुनिकीकरण तथा बन्द रहेका उद्योगहरु संचालन नभएसम्म मधेशको विकास नहुने भन्दै वर्तमान सरकार भ्रष्टाचारमा लिप्त रहेको विकास हुन नसकेको आरोप लगाए ।

उनले अबको लक्ष्य आउँदो निर्वाचनमा सिंहदरबारको कुर्सी कब्जा हुनेछ, कुर्सी कब्जा भएपछि मात्रै संविधान संशोधन र विकासको रोडम्याप लागु हुने भन्दै प्रधानमन्त्रीको समृद्धिको कुरा नाटक मात्रै रहेको भन्दै मुलुकलाई समृद्ध बनाउन जनतालाई अधिकार सम्पन्न बनाउनुपर्ने र अधिकार सम्पन्न बनाउन संविधान संशोधन हुनुपर्ने भन्दै विभिन्न दलका ठूला नेताहरू भ्रष्टाचारमा व्यस्त रहेकोले अधिकार सम्पन्न मुलुक निर्माणका लागि जसपा सदैव लडि रहने बताए ।

यसैगरि पार्टीका कार्यकारिणी अध्यक्ष उपेन्द्र यादवले विकास बजेट र राजनीतिक नियुक्तिमा अझै भेदभाव कायमै रहेकोले भेदभाव अन्त्यका लागि एक ढिक्का हुनु आवश्यक रहेको भन्दै देशमा नयाँ प्रणालीको सुरुवातका लागि निरन्तर संघर्षको आवश्यकता रहेको बताए । उनले पाएको अधिकारलाई सुनिश्चित गर्दै बाँकी अधिकारको लागि सधैं पार्टी संघर्ष गरि रहने बताए ।

कार्यक्रममा प्रदेश २ का मुख्यमन्त्री लालबाबु राउत गद्दी लगायत जिल्लाका प्रदेश सभा सदस्य सहित पार्टीका नेता कार्यकर्ताहरुको उल्लेख्य उपस्थिति रहेको थियो । कार्यक्रमस्थलमा आयोजक कमिटिले ‘भौतिक दूरी कायम गरी बसौं । मास्कको प्रयोग गरौं । साबुन पानीले हात धौऔं’ अँकित प्लेकार्ड लेखिएर टाँसिएको थियो तर त्यसको पालना भने कसैले गरेका थिएनन् । कोरोना महामारीको उच्च जोखिम कायमै रहेकाले भौतिक दूरी, मास्क र बेलाबेला हात धुन प्रशासनले अनुरोध गर्दै आएको छ ।

यसबारे पर्साका प्रमुख जिल्ला अधिकारी अस्मान तामाङले कार्यक्रम नगर्न भन्दा भन्दै कार्यक्रमको आयोजना गरिएको बताए । कोरोना संक्रमणलाई मध्यनजर गर्दै पर्सा जिल्लामा औपचारिक रुपमा सभा सम्मेलनमा रोक लगाइएको भन्दै प्रजिअ तामाङ्गले कार्यक्रम नगर्न प्रहरीलाई निर्देशन दिइएकोमा पनि आयोजक पार्टीले नटेरेको बताए । पार्टी प्रवेश कार्यक्रमका लागि निर्माण गरिएको पण्डाल बाहिर नेपाल प्रहरी र सशस्त्र प्रहरीको उपस्थिति रहेको थियो । नेताहरुको सुरक्षा र स्कर्टिङका लागि सुरक्षाकर्मी पनि परिचालन गरिएको थियो ।