जनमतको ‘जन कारवाही’बाट मुख्यमन्त्री गद्दी तनावमा, सुरक्षा निकायसंग गरे विशेष बैठक

राजनिति

गृहपृष्ठ
राजनिति
जनमतको ‘जन कारवाही’बाट मुख्यमन्त्री गद्दी तनावमा, सुरक्षा निकायसंग गरे विशेष बैठक

जनमतको ‘जन कारवाही’बाट मुख्यमन्त्री गद्दी तनावमा, सुरक्षा निकायसंग गरे विशेष बैठक

वीरगंज । जनकपुर उपमहानगरपालिकामा डा। सिके राउत नेतृत्वको जनमत पार्टीले गरेको ‘जन कारवाही’बाट प्रदेश २ का मुख्यमन्त्री लालबाबु राउत गद्दी तनावमा परेका छन् ।

भ्रष्टाचारीलाई नछोड्ने भन्दै जनमतका कार्यकर्ता आफैंले कारवाही गर्न थालेपछि ‘बेटी पढाउ, बेटी बचाउ’ योजनाअन्तर्गत साइकल खरिदमा भ्रष्टाचारका आरोपित मुख्यमन्त्री गद्दी व्यापक तनावमा परेको बुझिएको छ ।

अख्तियार दुरुपयोग अनुसन्धान आयोगले साइकल खरिद सम्बन्धी कागजहरु अहिले अध्ययन गरिरहेको छ । जनमत पार्टीले भने अख्तियारको बर्दिबासस्थित प्रादेशिक कार्यालयमा मुख्यमन्त्री राउतलाई कारवाही गर्न ज्ञापन बुझाएर धर्ना र प्रदर्शन गरिसकेको छ ।

बिहिवार जनमतका कार्यकर्ताले ढल–पानी निकासका लागि काम नगरेको र भ्रष्टाचार गरेको भन्दै जनकपुरको खानेपानी कार्यालयका प्रमुख राजेश कुशवाहालाई हिलो छ्यापेर बजारभरी घुमाएको थियो ।

मुख्यमन्त्री गद्दीलाई पनि भ्रष्टाचारको ठुलो आरोप लागेको र झन् जनमत पार्टीले त्यसको विरोध गरिरहेको अवस्थामा त्यसबाट प्रदेश २ सरकार भयभित भएको जानकारहरुको बुझाइ छ ।

जनमत पार्टीको भएकै कारण मुख्यमन्त्री गद्दीले आज प्रादेश २ का प्रादेशिक शुरक्षा प्रमुखहरुसंग सुरक्षा व्यवस्थाबारे विशेष बैठक गरेका छन् । जनकपुरस्थित मुख्यमन्त्रीको सरकारी निवासमा भएको बैठकमा जनमत पार्टीले गरेको जन कारवाही र त्यस पश्चात उत्पन्न परिस्थितिका बारेमा छलफल भएको बुझिएको छ ।

सरकारी कर्मचारीमाथिको जनमतको कारवाही र थप कारवाही गर्ने धम्कीबाट प्रदेशका कर्मचारी, जनप्रतिनिधिहरुलाई सुुरक्षित राख्न विशेष सुरक्षा प्रदान गर्न मुख्यमन्त्री गद्दीले सुरक्षा निकायका प्रमुखहरुलाई आग्रह गरेको बुझिएको छ ।

मुख्यमन्त्रीको सञ्चार सोतबाट उक्त बैठक नियमित भएको भनिए पनि, त्यहाँ उठेका मुद्दा जनमत पार्टी र जनकपुर घटना केन्द्रित नै रहेको स्रोतको दाबी छ । बैठकमा मुख्यमन्त्री गद्दीको हाउभाउ एकदमै अतालिएको र तनावपुर्ण देखिएको श्रोतले बतायो ।

बैठकमा मुख्यमन्त्रीसहित प्रदेशका मन्त्रीहरु, नेपाल प्रहरी र सशस्त्र प्रहरीका डिआईजी, नेपाली सेनाका अधिकारीलगायत सहभागि थिए । यता, जनमत पार्टीले जनकपुरमा गरेको जनकारवाही पश्चात उसको १७ जना नेता कार्यकर्ताहरुलाई प्रहरीले पक्राउ गरेको भन्दै आजदेखि विरोधका कार्यक्रमहरु शुरु गरिसकेको छ ।