वीरगञ्ज बालसुधारका थुनुवा बालकहरुलाई सास्ती

स्थानिय

गृहपृष्ठ
स्थानिय
वीरगञ्ज बालसुधारका थुनुवा बालकहरुलाई सास्ती

बालसुधार गृहका बालकहरुले सास्ती खेप्नु परेको गुनासोवीरगञ्ज बालसुधारका थुनुवा बालकहरुलाई सास्ती

शुक्रबार, जेठ २६, २०८०मध्य नेपाल संवाददाता

वीरगञ्जस्थित बालसुधार गृहमा रहेका थुनुवा बालकहरुले सास्ती खेप्नु परेको गुनासो आएपछि पर्साका प्रमुख जिल्ला अधिकारी हिरालाल रेग्मीले बिहीबार बाल सुधारगृहमा अनुगमन तथा निरीक्षण गरेका छन् ।

वीरगञ्जमा बिहीबार इन्सेकले आयोजना गरेको कार्यक्रममा सहभागीहरुले वीरगञ्जस्थित बाल सुधारगृहमा रहेका बालकहरुले सास्ती खेप्नुपरेको गुनासो गरेका थिए । गुनासो सुनेलगत्तै कार्यक्रममा सहभागी प्रमुख जिल्ला अधिकारीले बालसुधार गृहमा पुगेर अनुगमन तथा निरिक्षण समेत गरेका हुन् ।

अनुगमन तथा निरीक्षणको क्रममा प्रमुख जिल्ला अधिकारी रेग्मीलाई बालसुधार गृहका निमित्त प्रमुख कृष्ण साह गोढले शौचालय, सुत्ने कोठा लगायत पर्याप्त संरचनाको अभावमा गर्मीमा बालकहरुले झेल्नुपरेको समस्याहरुबारे जानकारी दिए ।
साहकाअनुसार बालसुधार गृहको कूल क्षमता ५० जनाको मात्र हो । तर अहिले बालसुधार गृहमा क्षमता भन्दा तीनगुणा अर्थात १ सय २८ जना थुनुवा बालकहरुलाई राखिएको छ । बालसुधार गृहको एउटा कोठामा २० जनासम्म बालकहरुलाई राख्नु पर्ने बाध्यता रहेको साहले बताए ।

उनले भने, ‘बालबालिका सम्बन्धित मुद्धामा १ सय २० दिनमा फैसला हुनु पर्नेमा वीरगञ्जको बालसुधार गृहमा रहेका बालकहरुको हकमा भने बकपत्र र पेशीसमेत नहुँदा कारागार पठाउने उमेर पुगेका युवार किशोरहरुलाई समेत राख्नु परेको छ । यसले झन् समस्या भएको छ । यहाँ राखिएका बालकहरुको संख्याको अनुपातमा भौतिक संरचनाको अभाव छ, कोठाहरु साँघुरा छन्, शौचालयपनि अप्रयाप्त नै छ ।’

अनुगनमका क्रममा प्रजिअ रेग्मीलाई साहले बालसुधार गृहमा राखिने बालकले जनही कारागार नियमावलीले तोकेको दैनिक ७ सय ग्राम चामल र ६० रुपैयाँ पाउँदै आएको र बालसुधार गृहमा हाल एक जना स्टाप नर्स कार्यरत रहेको पनि कार्यालयका निमित्त प्रमुख साहले जानकारी दिएका छन् ।

अनुगमनका क्रममा रहेका प्रमुख जिल्ला अधिकारी रेग्मीले बालसुधार गृहमा भएको अभाव र अपर्याप्त संरचनाको व्यवस्थापनका लागि सम्बन्धित स्थानीय निकाय वीरगञ्ज महानगरपालिकामा पहल गर्ने तसल्ली दिए । उनले भने, ‘सङ्घीय सरकारको निकायमा पनि यसबारे जानकारी गराइसकेका छौं, समस्या समाधान गर्ने पहल भईरहेको छ ।’

वीरगञ्जको बालसुधार गृहमा सबैभन्दा धेरै जबरजस्ती करणी, लागूऔषध र चोरी डाँकाको आरोप लागेका बालकहरु छन् ।