गर्मीले जनजीवन अस्तव्यस्त अस्पतालमा बिरामीको भीड

स्थानिय

गृहपृष्ठ
स्थानिय
गर्मीले जनजीवन अस्तव्यस्त अस्पतालमा बिरामीको भीड

गर्मीले अस्तव्यस्तगर्मीले जनजीवन अस्तव्यस्त अस्पतालमा बिरामीको भीड

सोमबार, जेठ २९, २०८०मध्य नेपाल संवाददाता

एक–डेड हप्ताबाट बढेको अत्यधिक गर्मीको कारण मध्य तराईको पर्सा, बारा, रौतहट लगायतका जिल्लामा जनजीवन कष्टकर बन्दै गएको छ । बिहानैदेखि लाग्ने चर्को घाम तथा बहने तातो हावाका कारण जनजीवन थप कष्टकर बन्दै गएको हो ।

गर्मी बढ्दै जाँदा पर्साको सदरमुकाम वीरगंज, बाराको कलैया, रौतहटको गौर बजार जस्तो सर्वसाधारणको बढि जनघनत्व भएका ठाउँमा समेत सर्वसाधारणको चहल पहलमा कमी देखिन थालेको छ । बिहानैदेखि लाग्ने चर्को घाम र तातो हावाका कारण घरबाट बाहिर निस्कन सर्वसधारणलाई सकस भइरहेको छ । तराई जिल्लाका सरकारी कार्यालयहरुमा विगतको तुलनामा एक्कासी बढेको गर्मीसँगै सेवाग्राहीहरुको संख्या पनि पातलिएको जिल्ला प्रशासन कार्यालयहरुले जनाए । सेवा प्रदायक कार्यालयमा टाढा टाढाबाट आउने सेवाग्राहीहरु चर्को घाम र प्रचण्ड गर्मीका कारण सेवा लिन भन्दा पनि शितलता खोजेर ज्यान बचाउन तल्लिन छन् । फलतः सरकारी सेवा प्रदायक कार्यालयहरुमा सेवाग्राहीहरुको संख्या पनि पातलिएको हो ।

केहि सातादेखि बढेको गर्मि तथा सुख्खा यामका कारण बारा, पर्सा, रौतहट गरी ढेड दर्जन बढी घरमा आगलागीका घटना समेत भइसकेको संघीय प्रहरी ईकाई कार्यालय नारायणी वीरगंजले जनाएको छ । गर्मीका कारण बढी पसिना बगेर शरीरमा पानीको मात्रा कम भई टाउको दुख्ने, झाडा पखाला लाग्ने, रिंगटा लाग्ने जस्ता लक्षणहरु बढी देखा पर्न थालेको नारायणी अस्पतालका फिजिसियन डा. निरज सिंहले बताए । चिकित्सक सिंहका अनुसार अहिले ज्वरो, झाडापखाला, टाईफाईड जस्ता विरामीले अस्पतालको वार्डदेखि ओपडी डिपार्टमा समेत बिरामीले भरिभराउन हुन थालेको उनको तर्क छ ।

विहानको खाना दिउसो खादाँ फुड प्वाइजन
पहिलाको तुलनामा अहिले विरामीको संख्या बढेको छ । यो कुरा प्रत्येक दिन २ दर्जनभन्दा बढी झाडा पखालाकै विरामीहरु आउने गरेको अस्पतालले जनाएको छ । बिरामी हुनेमा अधिकांश ८÷१० बर्ष मुनिका बालबालिकाहरु र बृद्धबृद्धाहरुको संख्या बढी रहेको अस्पतालका डा सिंहले बताए । चिकित्सकहरुका अनुसार प्रत्येक दिन बढदै गएको गर्मीको मौसमको प्रतिरोध गर्न नसक्दा बालबालिकाहरुमा झाडापखाला र ज्वरोको असर बढि देखिएको खुलेको छ । यससंगै गर्मिमा देखिने छालारोग लगायत घाउ खटिराका बिरामीहरुको चाप समेत ओ.पि.डि सेवामा बढ्ेको उनीहरुको भनाइ छ । गर्मीमा बिहानको खाना दिउसो खाँदा फूड प्वाइजन भई झाडापखाला लागेर विरामी हुने पनि अस्पतालमा बढि आउन थालेको नारायणी अस्पतालले जनाएको छ । बिहान पकाएको खाना खादाँ फुड प्वाईजन हुने भएकाले अनभिज्ञताले गर्दा पनी बिरामीहरुको संख्या बढेको छाला तथा यौनरोग विशेषज्ञ डा. सुमन प्रसादले पनि बताए । गर्मीले घाऊ खटिरा, हात खुट्टा चिलाउने जस्ता समस्याहरु पनि बढी देखिन थालेको उनको भनाइ छ ।
गर्मीमा बच्न मध्यान्हमा घाममा ननिस्कने, झोल पदार्थ खाने र राती झुल लगाएर मात्र सुत्ने गर्नुपर्ने चिकित्सकहरुको सुझाव छ ।

गर्मीले तराईको ग्रामीण भेगका किसानहरुले आफ्नो खेतहरु खनजोत गरी विऊ छर्न समेत सकेका छैनन् । सिंचाइको अभावले सुख्खा व्याडमा नै बीउ लगाउन ठिक्क पारेको ठाउँ समेत सुकेर जमिन धुलाम्मे भएपछि किसानहरु छक्क परेका छन् । खेतबारीमा काम गर्न समेत उनीहरुलाई निकै सकस भएको गुनासो गरे । सुख्खा र चर्को घामले विउ विजन छर्ने काम पनि प्रभावित हुन पुगेको उनीहरुको तर्क छ । नहर र बोरिङको सिचाइ सुविधा पनि राजनीतिक आडमा नेता, कार्यकर्ता र उनीहरुका आसेपासेले बढि पाउने गर्दा वास्तविक किसान भने राज्यको सुविधाबाट समेत वञ्चित रहेको उनीहरुको गुनासो छ । यता चैते धानमा समेत यो पटक प्रभाव पर्न थालेको कृषि ज्ञान केन्द्रका प्रमुख डा. रामचन्द्र प्रसाद यादवले बताए ।

गर्मी बढेकाले चिसो पेय पदार्थको विक्रि वितरण भने बढेको छ । बजारमा काक्रो, उखु, दही, लस्सी, कोलड्रिङ्ग्स, भुई कटहर, सातु लगायतको कारोबार भने बढेको माईस्थान दही भण्डारका उमेश साहले बताए । वीरगंजका विभिन्न ठाउँमा विगतका दिनहरुमा जस्तो निःशुल्क रुपमा पानी खुवाउदै आउनेको पनि केही कमी देखिएको छ । यता समर्पण सेवा संस्थाले भने विगतको निरन्तरतालाई कायम राखेको छ । अन्य व्यक्ति, निकाय र राज्यका तर्फबाट पनि सर्वसाधारणलाई खाने पानीको व्यवस्था गरिदिने हो भने केही राहत हुने बटुवाहरुको सुझाव छ ।