सहकारी संस्था बचत रकम दुरुपयोग सम्बन्धमा गठित संसदीय छानबिन विशेष समितिले सहकारीको रकम हिनामिना र अपचलनमा संलग्न भएर विदेश भागेका १८ जनालाई स्वदेश फर्काउन गृहमन्त्रीलाई निर्देशन दिएको छ ।
आज बसेको समितिको बैठकले गृहमन्त्री रमेश लेखक तथा गृहसचिव एकनारायण अर्यालसँग छलफल गरेपछि देशबाहिर फरार भएका १८ जनालाई स्वदेश फर्काउन निर्देशन दिएको हो ।
बैठकपछि सञ्चारकर्मीलाई जानकारी दिँदै समिति सभापति सूर्यबहादुर थापा क्षेत्रीले सहकारीको रकम अपचलनमा मुछिएका १८ जनालाई खोज्न, स्वदेश फर्काउन र छानबिन प्रक्रियामा सघाउन गृहमन्त्रीलाई निर्देशन दिएको जानकारी दिए । उनलेले सानोपाइला, सहारा, सूर्यदर्शन, स्वर्णलक्ष्मी, हाम्रो नयाँ कृषि, सुप्रिम र समानता सहकारीको बचत रकम दुरुपयोग सम्बन्धमा छानबिनको दायरामा रहेका जीबी राईलाई स्वदेश फर्काउन निर्देशन दिएको पनि बताए ।
यस्तै समितिले सुमेरु र कालीमाटी सहकारीका भरत महर्जन, राजमाया महर्जन, सचिन महर्जन र सरला महर्जनलाई स्वदेश फर्काउन निर्देशन दिएको छ । यसैगरी सूर्यदर्शन सहकारीका अध्यक्ष भइसकेका ज्ञानबहादुर बम्जन र थानबहादुर बुढा मगर, शिवशिखर सहकारीका भूपेन्द्र राई, तेजबहादुर बम्जन तामाङ र लीलानाथ गौतम, इमेज सहकारीका देवकुमार नेपाली, छेदा नेपाली र दीपक पौडेल, सानो पाइलाका तस्विरण खातुन र असरफ अली, सहारा सहकारी र सुप्रिमका सुवास केसी, कान्तिपुर सहकारीका प्रेमध्वज लामा र मेगाड्रिम सहकारीका महाशंकर रेग्मीलाई नेपाल फर्काउन पनि समितिले निर्देशन दिएको छ ।
समितिले कारागार र थुनामा रहेका २४ जना सोधखोज गर्नुपर्ने देखिएको भन्दै सोधपुछ गर्नुपर्नेहरूको नाम पनि गृहमन्त्रीलाई बुझाएको छ ।
