रौतहटको चन्द्रपुर नगरपालिका–४, धन्सार पुल नजिक पूर्व–पश्चिम राजमार्गमा स्कारपियो गाडी दुर्घटना हुँदा ८ जनाको ज्यान गएको छ भने ५ जना घाइते भएका छन्।
निजगढबाट चपुरतर्फ जाँदै गरेको बा१६च ३१६२ नम्बरको स्कारपियो गाडी अनियन्त्रित भई दुर्घटना भएको प्रहरीले जनाएको छ।
दुर्घटनामा मृत्यु हुनेहरूमा सिरहा, अर्नमा गाउँपालिका–३ बंठियाटोलका ६० वर्षीया लरुवतीदेवी महरा, ३० वर्षीया उर्मिला महरा, ५० वर्षीया रामकुमारी महरा, ५५ वर्षीया महगींदेवी महरा, ६२ वर्षीया फुलमन्तिदेवी चमार, ६० वर्षीया रामकुमारीदेवी महरा, ३० वर्षीया सकुन्तलादेवी महरा र अर्नमा–५ बलुवाटोलका ४० वर्षीय स्कारपियो चालक श्रीकुमार यादव रहेका छन्।
दुर्घटनामा अर्नमा–३ की ३० वर्षीया राधा राम, सोही ठाउँका उमेश रामका २ वर्षीय छोरा आर्यन, २५ वर्षीया देवकुमारी महरा, उनका ७ वर्षीय छोरा रितिक महरा र ६० वर्षीया कन्यादेवी महरा घाइते भएका छन्।
घाइतेहरूको चन्द्रपुरस्थित हाइवे ट्रमा अस्पताल र वीरगञ्जस्थित बयोधा अस्पतालमा उपचार भइरहेको छ। दुर्घटनाबारे थप अनुसन्धान भइरहेको प्रहरीले जनाएको छ।
