प्रहरीले राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्धको अनुसन्धान सकेर रायसहितको प्रतिवेदन जिल्ला सरकारी वकिल कार्यालयलाई बुझाएको छ।
जिल्ला प्रहरी कार्यालय, पोखराका डिएसपी वसन्त शर्माले सोमबार लामिछानेसम्बन्धी अनुसन्धान प्रतिवेदन जिल्ला सरकारी वकिल कार्यालयमा बुझाइएको पुष्टि गरेका छन्। यो प्रकरणमा प्रहरीका पूर्वडीआईजी छविलाल जोशीलगायतका व्यक्ति प्रतिवादी रहेका छन्।
सहकारी ठगी र सम्पत्ति शुद्धिकरणको आरोप
प्रहरीले लामिछानेमाथि सहकारी ठगी, संगठित अपराध, र सम्पत्ति शुद्धिकरणको कसुरमा कारबाहीको मागसहित प्रतिवेदन पेश गरेको जनाएको छ। कास्कीको सूर्यदर्शन सहकारी संस्थामा बचतकर्ताले राखेको रकम अनियमिततामा संलग्न रहेको ठहर गर्दै प्रतिवेदन बुझाइएको हो।
अनुसन्धानका क्रममा गोर्खा मिडिया नेटवर्कमा सहकारीको रकम जथाभावी खर्च गरिएको र लामिछाने त्यसमा संलग्न रहेको प्रमाण भेटिएको प्रहरीको भनाइ छ। प्रहरीले लामिछानेले सहकारीलाई ऋण तिर्न काटेका चेकहरू पनि बरामद गरेको छ, जसलाई ठगीमा संलग्नताको बलियो प्रमाण मानिएको छ।
लामिछानेको दाबी र अनुसन्धानको निष्कर्ष
अनुसन्धानका क्रममा लामिछानेले आफू गोर्खा मिडिया नेटवर्कको प्रबन्ध निर्देशक हुँदा रित्तो चेक काटेर छाड्ने गरेको दाबी गरेका छन्। उनले आफ्नो चेकमा अरूले नाम लेखेर प्रयोग गरेको हुनसक्ने जिकिर गरेका छन्। तर, प्रहरीको अनुसन्धानले सूर्यदर्शन सहकारीसहित काठमाडौंको स्वर्णलक्ष्मी सहकारी, चितवनको साहारा चितवन सहकारी, र वीरगञ्जको सानो पाइला सहकारीमा पनि अनियमितता भेटिएको देखाएको छ।
२२ करोडभन्दा बढी रकम अनियमितताको दाबी
संसदीय समितिको प्रतिवेदनअनुसार पोखराको सूर्यदर्शन, बुटवलको सुप्रिम बचत तथा ऋण सहकारी, काठमाडौंको स्वर्णलक्ष्मी सहकारी, चितवनको साहारा चितवन, वीरगञ्जको सानो पाइला बचत तथा ऋण सहकारी र नेपालगञ्जको समानता सहकारीबाट २२ करोड ४६ लाख ३० हजार रुपैयाँ गोर्खा मिडिया नेटवर्कमा गएको थियो।
समितिको प्रतिवेदन कार्यान्वयनका क्रममा पूर्वडीआईजी छविलाल जोशीलाई ६ असोजमा र लामिछानेलाई २ कात्तिकमा बनस्थलीस्थित पार्टी कार्यालयबाट पक्राउ गरिएको थियो।
