कास्की प्रहरीले सहकारी संस्थाको रकम हिनामिना प्रकरणमा राष्ट्रिय स्वतन्त्र पार्टी (रास्वपा) सभापति रवि लामिछानेसहितका व्यक्तिहरुलाई आज जिल्ला अदालत, पोखरामा उपस्थित गराएको छ।
सहकारी रकम अपचलन प्रकरणले थप जटिल मोड लिँदै गर्दा उनीहरुमाथि अभियोजन दर्ता प्रक्रिया अघि बढाइएको छ। पोखराको सूर्यदर्शन सहकारी ठगी प्रकरणमा ८४ दिन लामो अनुसन्धानपछि सोमबार सरकारी वकिलको कार्यालयमा प्रतिवेदन बुझाइएको थियो। उक्त प्रतिवेदनमा लामिछानेसहित ५१ जनालाई प्रतिवादी बनाइएको छ, जसमध्ये ३७ जना फरार रहेको प्रहरीले जनाएको छ। प्रतिवादीहरुविरुद्ध १ अर्ब ५१ करोड रुपैयाँ बिगो मागदाबी गर्नुपर्ने राय प्रतिवेदनमा उल्लेख छ।
प्रतिनिधि सभा सदस्य सूर्य थापा नेतृत्वको संसदीय समितिले पोखराको सूर्यदर्शन, बुटवलको सुप्रिम बचत तथा ऋण सहकारी, काठमाडौंको स्वर्णलक्ष्मी सहकारी, चितवनको साहारा बहुउद्देश्यीय सहकारी, वीरगञ्जको सानो पाइला बचत तथा ऋण सहकारी र नेपालगञ्जको समानता सहकारीका रकम गोर्खा मिडियामा लगेर अपचलन गरिएको निष्कर्ष निकालेको थियो। समितिले रवि लामिछानेसहितका व्यक्तिहरुलाई संलग्न देखाउँदै कारबाही सिफारिस गरेपछि अनुसन्धान अघि बढाइएको हो। त्यस क्रममा छविलाल जोशीलाई असोज ६ गते र रवि लामिछानेलाई कात्तिक २ गते पक्राउ गरिएको थियो।
अनुसन्धान प्रतिवेदनका आधारमा थप अभियोजन प्रक्रिया अघि बढाउन प्रहरीले अदालतबाट म्याद थप गर्न अनुमति मागिरहेको छ। यसै क्रममा, लामिछानेसहित गोर्खा मिडियाका पूर्वउपाध्यक्ष छविलाल जोशी, नेचर हर्ब्सका सञ्चालक रामबहादुर खनाल र जीबी राईका सहयोगी लिला पछाईंलाई आज अदालतमा उपस्थित गराइएको हो। सरकारी वकिल कार्यालयले प्रतिवेदन अध्ययन गरेर अभियोजन तयार गर्न केही समय लाग्ने जनाइएको छ।
यो प्रकरणले सहकारी क्षेत्रमा देखिएको अपारदर्शिता र ठगीको जटिलता उजागर गरेको छ। ठगीमा संलग्न ठहरिएका फरार प्रतिवादीहरुको खोजी जारी छ भने सहकारी पीडितहरुले रकम फिर्ता र न्यायको माग गरिरहेका छन्।
