शनिबार एस्टन भिल्लासँगको २-१ को पराजयपछि म्यानचेस्टर सिटी पछिल्ला आठ खेलको प्रदर्शनमा प्रिमियर लिगको फर्म तालिकाको तल्लो स्थानमा छ। सिटीसँगै साउथह्याम्पटन पनि समान अवस्थामा छ।
साउथह्याम्पटनले पछिल्ला आठ खेलमा ४ अंकमात्रै जोडेको छ, जसमा १ जित, १ बराबरी र ६ हार समावेश छ। म्यानचेस्टर सिटीको पनि यही नतिजा छ। यदि आइतबार साउथह्याम्पटनले फुलहमविरुद्ध कम्तीमा बराबरी हासिल गर्यो भने सिटी प्रिमियर लिगको सबैभन्दा खराब लयमा पर्नेछ।
यो परिदृश्य पेम गार्डियोलाका लागि चुनौतीपूर्ण छ। इडरसन, नाथान आके, र रुबेन डियासको चोटका कारण अनुपस्थिति र लम्बिएको समयदेखि रोड्रीको अभावले टिमलाई कमजोर बनाएको छ। शनिबारको पराजयपछि गार्डियोला सकारात्मक देखिए पनि लिग शीर्षकको दौडमा पछि पर्नु सिटीका समर्थकहरूको लागि चिन्ताजनक छ।
सिटीले एस्टन भिल्लाको खेलमा सुरुमै जस्को ग्वार्डिओलको गल्तीका कारण पहिलो २० सेकेन्डमै अवसर खेर फाल्यो। यस्तै, १०० मिलियन पाउण्डमा अनुबन्धित ज्याक ग्रिलिसले पनि खेलमा प्रभाव जमाउन सकेनन्।
बिबिसीको म्याच अफ द डे मा पूर्व इंग्ल्यान्ड कप्तान एलन शियररले भने, "सिटीले पछिल्ला खेलहरूमा धेरै गोल खाएको छ। मिडफिल्डको कमजोरी र रक्षामा लचकता कारण टिम बारम्बार समस्यामा परेको छ। यो समय सिटीको प्रदर्शनमा धेरै कमजोरी देखिन्छ।"
गार्डियोलाको प्रतिक्रिया
खेलपछि गार्डियोलाले भने, "समस्या हाम्रो हो र समाधान पनि हामीले नै खोज्नुपर्छ। हाम्रो केन्द्रीय रक्षामा मात्र एकजना खेलाडी फिट छन्, जुन कठिन छ। तर हामीले सकारात्मक सोच राख्नुपर्छ र अर्को खेलमा सुधार गर्ने अवसर लिनेछौं।"
उनले थपे, "पछिल्लो सिजन हामीले लिग जित्यौं, तर यहाँ पराजित भयौं। फुटबलमा समस्या सधैं एक कारणले मात्र हुँदैन। धेरै साना-साना कुराहरूले परिणामलाई असर गर्छ। हाम्रो खेलाडीहरूको आत्मविश्वास र चाहनामा मलाई विश्वास छ। हामीले छिटै सुधार गर्ने उपाय खोज्नेछौं।"
भिल्लाका प्रशिक्षक उनाइ एमरीले सिटीको आत्मविश्वासको अभावको फाइदा उठाउन सकेको बताए। उनले भने, "म्यानचेस्टर सिटी सामान्य अवस्थामा रहेको जस्तो आत्मविश्वासी देखिएन। दोस्रो हाफमा हामीले दबाब बनाएर खेल नियन्त्रणमा लियौं।"
