राष्ट्रिय स्वतन्त्र पार्टी (रास्वपा) का सभापति रवि लामिछानेलाई प्रहरीको जिम्मा लगाउने आदेश काठमाडौं जिल्ला अदालतले दिएको छ। जिल्ला न्यायाधीश माधवप्रसाद अधिकारीको इजलासले लामिछानेलाई सोमबार पुनः अदालत पेस गर्ने गरी प्रहरीको जिम्मा लगाउन आदेश दिएको हो।
स्वर्णलक्ष्मी सहकारी ठगी मुद्दा
गत बिहीबार कास्कीको सूर्यदर्शन सहकारी ठगी मुद्दामा धरौटीमा रिहा भएका लामिछानेविरुद्ध काठमाडौंको स्वर्णलक्ष्मी सहकारी ठगीसम्बन्धी मुद्दा दर्ता भएको थियो। यही मुद्दामा बयानका लागि लामिछाने आइतबार आफैं अदालतमा उपस्थित भएका थिए।
बयान लगत्तै न्यायाधीश अधिकारीको इजलासमा थुनछेक बहस हुनुपर्ने भए पनि समय अभावका कारण आजको लागि स्थगित गरिएको छ।
प्रहरी जिम्मा आदेशको कारण
रास्वपा अनुशासन आयोगका पूर्व उपप्रमुख तथा अधिवक्ता यज्ञमणी न्यौपानेका अनुसार थुनछेक बहसका लागि समय नपुग्दा इजलासले लामिछानेलाई प्रहरी जिम्मा लगाउने आदेश दिएको हो।
“बयान सकिँदा मात्र १५–२० मिनेट समय बाँकी थियो,” न्यौपानेले भने। “हामीले आजै थुनछेक बहसका लागि अनुरोध गरेका थियौं। तर, न्यायाधीशले प्रहरीकै जिम्मा दिनुपर्छ भन्नुभयो।”
परिवारको जिम्मा दिन अस्वीकार
न्यौपानेका अनुसार, लामिछानेलाई परिवार वा सरकारी वकिलको जिम्मा दिन आग्रह गरिएको थियो। तर, न्यायाधीश अधिकारीले सो प्रचलन नभएको बताउँदै प्रहरी जिम्मा दिनुपर्ने बताएका छन्।
अब, सोमबार थुनछेक बहसपछि मुद्दामा थप निर्णय गरिनेछ।
