नेपालका लागि आजको दिन ऐतिहासिक छ, किनकि पहिलोपटक आयोजना भएको खो-खो विश्वकपमा नेपाली पुरुष र महिला दुवै टोली फाइनलमा पुगेका छन्। भारतको नयाँ दिल्लीस्थित इन्दिरा गान्धी इन्डोर हलमा महिलातर्फको फाइनल बेलुका ७ बजे र पुरुषतर्फको फाइनल राति ८:१५ बजे सुरु हुनेछ।
खो-खो खेल नेपालमा त्यति चर्चित नभए पनि, यस विश्वकपको सफलता पछि यो खेलले नयाँ उचाइ पाएको छ। कुनै प्रचारबिना एक महिना लामो क्लोज क्याम्प पछि भारत पुगेको नेपाली टोलीले विश्वकपमा उत्कृष्ट प्रदर्शन गर्दै सबैलाई चकित पारेको छ।
महिला टोली अपराजित रहँदै समूह विजेता बनेर फाइनल पुगेको हो। समूह चरणमा भुटान, जर्मनी, श्रीलंका, र बंगलादेशलाई पराजित गर्दै क्वार्टरफाइनलमा इरानलाई १०३-८ र सेमिफाइनलमा युगाण्डालाई ८९-१८ ले हराउँदै नेपालले फाइनलमा स्थान बनायो।
पुरुषतर्फ, नेपाल समूह चरणमा एक खेल मात्र हार्दै फाइनल पुगेको छ। भारतसँग प्रारम्भिक खेलमा पराजित भए पनि, त्यसपछिका खेलहरूमा पेरू, ब्राजिल, र भुटानमाथि विजय प्राप्त गर्दै क्वार्टरफाइनलमा बंगलादेशलाई ६७-१८ र सेमिफाइनलमा इरानलाई ७२-२० ले हरायो।
नेपालका लागि यो विश्वकप ऐतिहासिक छ, किनकि अहिलेसम्म कुनै पनि खेलले यस्तो स्तरको प्रदर्शन गरेको थिएन। अब नेपालले फाइनल जित्दै ट्रफी उचाल्ने लक्ष्य राखेको छ। यो दिन नेपाली खेलकुद इतिहासमा विशेष रूपमा अंकित हुनेछ।
