दिल्ली प्रहरीको क्राइम ब्राञ्चले नेपाली उद्योगी सुरेश केडियाको अपहरणमा संलग्न रहेको भनिएका ग्याङ्गस्टर विकास सिंहलाई पक्राउ गरेको छ ।
केडिया २०७३ साल जेठ १२ गते अपहरणमा परेका थिए । यसको चार दिनपछि उनलाई १६ गते बिहारको मोतिहारीबाट बिहार प्रहरीले अपहरणमुक्त गरेको थियो ।
भारतीय प्रहरीका अनुसार केडियाले फिरौती स्वरुप सिंहका सहयोगीलाई नयाँ दिल्लीको चाँदनी चोकमा १० करोड भारु बराबरको सुन बुझाएका थिए । हिन्दुस्तान टाइम्समा प्रकाशित समाचार अनुसार फेरि निशानामा पर्ने डरले छुटेको तीन दिनपछि उनले १६ करोड नेपाली रुपैया बराबरको फिरौती बापत सुन बुझाएका थिए ।’
केडियाको अपहरणमा संलग्नताबाहेक सिंहले फिरौती रकमको बाँडफाँडको विवादमा अपहरणको मास्टरमाइन्ड भनिएका बब्लु दुवेको पनि ‘सफाया’ गरेका थिए । त्यतिबेला बुक्सार जेलमा रहेका दुवेलाई पटनाबाट १८२ किमी टाढा रहेको बेतियास्थित अदालत परिसरमा गोली प्रहार गरिएको थियो । सिंह केही महिनादेखि आशु पहलवानसँग दिल्लीमा लुकेर बसिरहेको र एउटा टुर र ट्राभल कम्पनी चलाइरहेको विशेष सूचना प्रहरीले पाएको थियो ।
अपहरण मुक्त भनिएका बेला विहार प्रहरीले गरेको पत्रकार सम्मेलन ।दिल्ली प्रहरीका क्राइम ब्राञ्चका डेप्युटी कमिश्नर राम गोपाल नायकले ‘नेपाली उद्योगीको अपहरण तथा बब्लु दुवेको हत्याका आरोपी बिहारका वान्टेड ग्याङ्गस्टर सिंह दिल्लीमा लुकेर बसेको सूचनाको आधारमा कारवाहीपछि गत शनिवार उनलाई पक्राउ गरिएको हो । सिंह दक्षिण दिल्लीस्थित संगम सिनेमा हल अगाडि राती १० बजे कसैलाई भेट्न आउने सूचना थियो । उनी त्यहाँ आइपुग्ने बित्तिकै प्रहरीले पक्राउ गरेको नायकले बताउनु भयो ।
सोधपुछका क्रममा सिंहले केडियाबाट प्राप्त फिरौती रकमको विवादमा दुवेको हत्या गरेको स्वीकार गरेको हिन्दुस्तान टाईम्पसले जनाएको छ । ‘बिहारका ग्याङ्गस्टर कुनाल सिंह र राहुल सिंह पनि केडिया अपहरण र दुवेको हत्यामा संलग्न रहेको अनुसन्धानबाट खुलेको दिल्ली प्रहरीले जनाएको छ । राहुल र कुनाल दुवै यसअघि नै पक्राउ परिसकेका छन् । दुवेले बुक्सार जेलमा रहेका बेला केडियाको अपहरणको योजना बुनेको प्रहरीको भनाई छ ।
सिंहको पक्राउसँगै प्रहरीले गाजियाबादको अर्का एक व्यवसायीको हत्याको योजनालाई पनि तुहाएको छ । ‘जुलाई १८ मा सिंहले गाजियाबादको एक व्यवसायीको हत्या गर्न १५ लाखको कन्ट्रयाक्ट र दुई वटा चिनियाँ पेस्तोल समेत पाएका थिए । हाल प्रहरीले उनका सहयोगी र हतियारको खोजी गरि रहेको दिल्ली प्रहरीका नायकले बताएका छन् ।
समाचार श्रोतका अनुसार केडियाले सो सुन वीरगंजका तत्कालिन सुन तस्कर राजु दारुका सँग लिएको र राजु दारुकाले नै दिल्लीमा सुन बुझाएको बयान ३३ किलो सुन गायब काण्डमा खुलेपछि नेपाल प्रहरीको सूचनाको आधारमा केडिया अपहरणका नाईके दिल्लीमा पक्राउ परेको बुझिाएको छ ।
