ब्राजिलियन फुटबल स्टार नेयमारले साउदी प्रो लिग क्लब अल-हिलालसँगको सम्झौता पारस्परिक सहमतिमा तोडेका छन्। ३२ वर्षीय नेयमार २०२३ को अगस्टमा ९० मिलियन युरो (£७७.६ मिलियन) मा अल-हिलालमा आबद्ध भएका थिए। तर चोटका कारण उनले क्लबका लागि जम्मा सात खेल मात्र खेल्न सके।
संसारकै महँगो खेलाडीका रूपमा परिचित नेयमारले सन् २०१७ मा पेरिस सेन्ट-जर्मेन (पीएसजी) मा £२०० मिलियनमा स्थानान्तरण गरेका थिए। तर यो सिजन उनले दुई मात्र खेल खेलेका छन्, अन्तिम पटक नोभेम्बरमा एक प्रतिस्थापन खेलाडीका रूपमा मैदान उत्रिएका थिए।
अल-हिलालले एक वक्तव्य जारी गर्दै भने, "क्लबले नेयमारलाई धन्यवाद र प्रशंसा व्यक्त गर्दछ, र उनको भविष्यको यात्रा सफल रहोस् भन्ने शुभकामना दिन्छ।"
नेयमारले दुई वर्षका लागि १५० मिलियन युरो (£१२९.२ मिलियन) वार्षिक तलबमा सम्झौता गरेका थिए। तर सम्झौता समाप्त हुँदा करिब सात महिना बाँकी रहेको थियो। क्लबमा आबद्ध हुँदा उनले "नयाँ खेलकुद इतिहास लेख्ने" इच्छा व्यक्त गरेका थिए। तर अक्टोबर २०२३ मा उरुग्वेविरुद्धको विश्वकप छनोट खेलका क्रममा घुँडाको लिगामेन्ट चुँडिएपछि उनी लामो समय मैदान बाहिर बसे।
नेयमारले २०१३ मा बार्सिलोनामा आबद्ध हुनुअघि सान्तोस क्लबका लागि १३६ गोल गरेका थिए। उनले बार्सिलोनामा चार सिजन बिताउँदै दुई ला लिगा, एक च्याम्पियन्स लिग र एक क्लब विश्वकप जितेका थिए। त्यसपछि पीएसजी जाँदा उनले पाँच लिग उपाधि जिते।
साउदी अरब गएका केही समयमै नेयमारले ब्राजिलको सबैभन्दा धेरै गोल गर्ने पुरुष खेलाडीको रेकर्ड तोड्दै ७८ गोल पूरा गरेका थिए। तर २०२३ मा घुँडाको चोट लागेपछि उनले ब्राजिलका लागि कुनै खेल खेलेका छैनन्।
नेयमार अहिले आफ्नो पुरानो क्लब सान्तोसमा फर्कने चर्चा चलेको छ। उनका समर्थकले नयाँ अध्यायका लागि उनको प्रतिक्षा गरिरहेका छन्।
