अस्ट्रेलियाका अलराउन्डर मार्कस स्टोइनिसले आफ्नो एकदिवसीय क्रिकेट करियरको समापन गरेका छन । अष्ट्रेलियाली क्रिकेटले ६ फेब्रुअरी (बिहीबार) यो जानकारी दिएको हाे । उनले अब टी२० क्रिकेटमा ध्यान केन्द्रित गर्ने बताइएको छ।
स्टोइनिसले २०१५ मा आफ्नो एकदिवसीय डेब्यु गरेको थिए र यसमा ७१ खेलमा भाग लिए। यस अघि उनलाई च्याम्पियन्स ट्रफीका लागि अस्ट्रेलियाको टोलीमा समावेश गरिएको थियो, र अब उनकाे स्थानमा विकल्प खेजिने अस्ट्रेलियन बाेर्डले जनाएकाे छ ।
"अस्ट्रेलियाका लागि एकदिवसीय क्रिकेट खेल्नु मेरो लागि अविस्मरणीय यात्रा भएको छ, र मैले यसमा पाएको प्रत्येक क्षणको आभारी छु। मेरो देशको प्रतिनिधित्व गर्नु सधैं मेरो लागि गौरवको कुरा हुनेछ," स्टोइनिसले भने।
"यो निर्णय लिन पकै पनि सजिलो थिएन, तर मलाई लाग्छ कि अब एकदिवसीय क्रिकेटबाट पन्छिन र मेरो करियरको अर्को अध्यायमा पूरा ध्यान दिनको लागि यो सही समय हो। मेरो र रोन (एन्ड्रयू म्याकडोनल्ड) बीचको सम्बन्ध अद्भुत छ र मैले उनका समर्थनको ठूलो कदर गरेको छु," उनले थपे।
स्टोइनिसको करियरमा सर्वोत्कृष्ट प्रदर्शन २०१७ मा न्यूजेल्याण्ड विरुद्ध भएको १४६ रनको अविजित पारी थियो, जुन उनले आफ्नो दोस्रो खेलमा खेलेका थिए। उनको अन्तिम एकदिवसीय खेल पाकिस्तानको भ्रमणमा भएको थियो र उनले एकदिवसीय क्रिकेटमा १४९५ रन र ४८ विकेटको योगदान दिएका छन्।
स्टोइनिस अस्ट्रेलियाको २०२३ विश्व कप विजेता टोलीका सदस्य पनि थिए र २०१८-१९ मा अस्ट्रेलियाको एकदिवसीय क्रिकेटरको वर्षको उपाधी पनि प्राप्त गरेका थिए।
अस्ट्रेलियाका पुरुष क्रिकेट मुख्य प्रशिक्षक एन्ड्रयू म्याकडोनल्डले भने, "स्टोइनिसले विगत दश वर्षमा हाम्रो एकदिवसीय क्रिकेट सेटअपमा महत्वपूर्ण भूमिका खेलेका छन्। उनी केवल एक अमूल्य खेलाडी मात्र होइन, समूहमा रहनु एक अविस्मरणीय अनुभव थियो। उनी एक प्राकृतिक नेता, अत्यन्तै लोकप्रिय खेलाडी र असल व्यक्ति हुन्। उनले आफ्नो एकदिवसीय करियर र सबै उपलब्धिहरूको लागि बधाई पाउनुपर्छ।"
