अन्तर्राष्ट्रिय महिला च्याम्पियनसिप अन्तर्गत नेपालले आज साँझ ६ बजे लिग चरणको अन्तिम खेलमा म्यानमारसँग प्रतिस्पर्धा गर्नेछ। फाइनलअघि हुने यो खेल दुवै टोलीका लागि तयारीको अवसर हुनेछ।
नेपाली टोलीमा तीन परिवर्तन
म्यानमारविरुद्धको खेलका लागि नेपाली टोलीमा तीन परिवर्तन गरिएको छ। नियमित कप्तान तथा गोलकिपर एन्जिला तुम्बापोको स्थानमा अन्जना रानामगरले मौका पाएकी छन् भने रेनुका नगरकोटीलाई कप्तानी जिम्मेवारी दिइएको छ।
यस्तै, विमला चौधरीको स्थानमा मिडफिल्डर सरू लिम्बू र रेखा पौडेलको स्थानमा रश्मिकुमारी घिसिङ प्लेइङ-११ मा परेकी छन्।
नेपाली टोली :
गोलकिपर : अन्जना रानामगर
डिफेन्डर : पूजा राना, गीता राना, विमला विक, समिक्षा घिमिरे
मिडफिल्डर : प्रीति राई, सरू लिम्बू, रेनुका नगरकोटी (कप्तान)
फरवार्ड : सावित्रा भण्डारी (साम्बा), सविता रानागर, रश्मिकुमारी घिसिङ
नेपाल र म्यानमारको प्रदर्शन
नेपाल र म्यानमार दुवैले यसअघि लिग चरणमा लगातार दुई खेल जितेर फाइनलमा स्थान पक्का गरिसकेका छन्। नेपालले किर्गिस्तान र लेबनानलाई समान १-० गोल अन्तरले पराजित गरेको थियो भने म्यानमारले लेबनानलाई ३-१ तथा किर्गिस्तानलाई ५-० गोल अन्तरले पराजित गरेको थियो।
फिफा वरीयतामा म्यानमार बलियो
नेपालको तुलनामा म्यानमार बलियो टोली मानिन्छ। फिफा वरीयतामा नेपाल १०३औं स्थानमा रहेको छ भने म्यानमार ५५औं स्थानमा छ।
नेपाल र म्यानमारबीचको प्रतिस्पर्धा इतिहास
नेपाल र म्यानमारको महिला फुटबल टोलीबीच हालसम्म तीन खेल भएका छन्। जसमा नेपालले जित निकालेको छैन। दुई खेलमा म्यानमार विजयी हुँदा एक खेल बराबरीमा टुंगिएको छ।
सन् २०१८ मा ओलम्पिक छनोट खेलमा नेपाल र म्यानमारबीच पहिलो पटक प्रतिस्पर्धा भएको थियो, जसमा १-१ को बराबरी भयो। नेपालका लागि सावित्रा भण्डारी (साम्बा) ले पेनाल्टीमार्फत गोल गरेकी थिइन्।
सन् २०१९ मा भारतमा आयोजित हिरो महिला गोल्डकपमा नेपाल र म्यानमारबीच दुई खेल भएका थिए। दुवै खेलमा नेपाल पराजित भएको थियो। लिग चरणमा म्यानमारले नेपाललाई ३-० ले हराएको थियो भने फाइनलमा पुनः ३-१ गोल अन्तरले पराजित गरेको थियो।
नेपालविरुद्ध म्यानमारको उत्कृष्ट प्रदर्शन
हालसम्म म्यानमारले नेपालविरुद्ध तीन खेलमा ७ गोल गरेको छ भने नेपालले जम्मा २ गोल गर्न सफल भएको छ।
आजको खेल नेपालका लागि म्यानमारविरुद्धको ऐतिहासिक नतिजा बदल्ने अवसर हुनेछ।
