सिराहाको नवराजपुर गाउँपालिका-१, भगवानपुरकी रिंकु सदाको बलात्कार र ज्यान गएको घटनाका मुख्य आरोपी रुपेश मण्डललाई प्रहरीले पक्राउ गरेको छ। मण्डललाई बुधबार सिराहाबाट पक्राउ गरिएको जिल्ला प्रहरी कार्यालय, सिराहाका प्रहरी नायब उपरीक्षक (डीएसपी) वीरेन्द्रकुमार पासवानले जानकारी दिएका छन्।
गत माघ ३० गते रिंकु आफ्नै घरमा मृत अवस्थामा भेटिएकी थिइन्। रिंकु मृत भेटिएपछि मण्डल फरार भएका थिए। रिंकु मृत भेटिएपछि उनको परिवारले रुपेश मण्डलसहित अन्य व्यक्तिहरूको विरुद्ध जाहेरी दिएका थिए।
घटना अनुसार, रिंकुले माघ २७ गते शौच गर्न जाँदा चार जना युवकहरूले सामूहिक बलात्कार गरेको बताएकी थिइन्। उक्त बलात्कारको घटना पञ्चायत बसेर मिलापत्र गरिएको थियो।
रिंकु मृत भेटिएपछि घटनामा संलग्न अन्य व्यक्तिहरूको नाम खुल्दै गएपछि रुपेश मण्डल, चन्दन साह, रामविनय मण्डल, नठुनी साह, रामपुकार मण्डल, रामकृपाल मण्डल, रामप्रित साह र विन्देश्वर साह विरुद्ध अपहरण, सामूहिक बलात्कार र हत्या गरी पञ्चायतको मिलापत्र गराएको आरोपमा अनुसन्धान सुरु गरिएको थियो।
पक्राउ परेकाहरूमध्ये तीन जनालाई फागुन ११ गते पक्राउ गरिएको थियो। घटनामा संलग्न अन्य आरोपित र पञ्चायतमा सहभागी भएर मिलापत्र गराएको आरोपमा चन्देश्वर मण्डल, रामविनय मण्डल र कम्लेशकुमार दासलाई पनि पक्राउ गरिएको छ।
डीएसपी पासवानका अनुसार, उनीहरूलाई हिरासतमा राखेर अनुसन्धान जारी छ।
