अन्तराष्ट्रिय महिला दिवस ८ मार्च २०२५ को अवसरमा फागुन २३ गते महागढीमाई नगरपालिकास्तरीय साइकल दौड प्रतियोगिता गरिएको छ । नगरपालिकाले मा.वि का छात्राहरु बीचमा धिमा गतिको साइकल दौड प्रतियोगिता गरेको हो ।
प्रतियोगिता श्री गढीमाई महेन्द्र प्राविधिक नमुना मा.वि बरियारपुर, बारामा अधिकार, समानता र सशक्तीकरणका लागि ११५ औं अन्तर्राष्ट्रिय नारी दिवसको अवसर पारेर गरिएको थियो । छोरी पढाउन आमाबुबाहरुलाई उत्प्रेरित गर्न र छात्राहरुको मनोबल बढाउने उद्देश्यले पालिका स्तरीय अतिरिक्त क्रियाकलापको आयोजना गरिएको आयोजक जनशक्ति युवा क्लबका अध्यक्ष विशाल कुमार लहेराले बताए । इस्लामिक रिलिफ नेपाल प्राविधिक, इस्लामिक रिलिफ क्यानडाको आर्थिक सहयोग तथा जन जागरण युवा क्लब बाराको आयोजनामा महागढीमाई नगरपालिकामा अन्तराष्ट्रिय महिला दिवसको उपलक्ष्यमा छात्रा साइकल दौड प्रतियोगिता गरेको जनाइएको छ ।
सो कार्यक्रममा प्रमुख अतिथि महागढीमाई नगरपालिकाको मेयर उपेन्द्र प्रसाद यादव, विशिष्ट अतिथि जन जागरण युवा क्लबका कोषाध्यक्ष सियाराम यादव,महागढीमाई शिक्षा शाखाका प्रमुख रामविश्वास प्रसाद चौरसिया, अतिथि महागढीमाईका वडाअध्यक्ष मनोज कुमार गुप्ता, विश्वनाथ प्रसाद कुशवाहा, वोहाब अन्सारी विकासशील युवा क्लबका अध्यक्ष श्यामसुन्दर यादव, साझा बाल क्लबका अध्यक्ष सोनाक्षी कुमारी लहेरा, विद्यालयका प्रधानाध्यापकहरुको उपस्थिति थियो ।
प्रतियोगिताको निर्णायक मण्डलमा शिक्षा शाखा प्रमुख रामविश्वास प्रसाद चौरसिया, जन जागरण युवा क्लबका कोषाध्यक्ष सियाराम यादव थिए । कक्षा ८ र ९ का छात्राहरु आन्तरिक छनौटबाट सिफारिस भएका प्रति विद्यालय २ जनाले मात्र प्रतियोगितामा भाग लिन पाउने प्रावधान राखिएको थियो । पालिकाभरीका विद्यालयबाट सहभागी छात्रा मध्ये श्री ने.रा.मा.वि बबुआइनका करिना चौधरी प्रथम, श्री गढीमाई महेन्द्र प्राविधिक नमुना मा.विका अनु कुमारी जयसवाल द्धितिय र शर्मिला पटेल तृतिय भए । प्रतियोगितामा प्रथम हुनेलाई ७ हजार ५ सयको लेडिज साइकल, स्टेशनरी, प्रमाण पत्र, शिल्ड प्रदान गरिएको थियो । द्धितिय हुने छात्रालाई ५ हजार, स्टेशनरी, मेडल, प्रमाण पत्र, शिल्ड र तृतिय हुने छात्रालाई ३ हजार, स्टेशनरी, प्रमाण पत्र, शिल्ड, प्रदान गरिएको छ । प्रतियोगितामा सहभागि हुने सबै छात्राहरुलाई मनोबल बढाउन स्टेशनरी, मेडल, प्रमाण पत्र प्रदान गरिएको छ ।
महागढीमाई नगरपालिकाको ७ वडा माविका छात्राहरुले साइकल दौड प्रतियोगितामा भाग लिएका थिए ।
