राष्ट्रिय परीक्षा बोर्ड, परीक्षा नियन्त्रण कार्यालयले यसवर्षको माध्यमिक शिक्षा परीक्षा (एसईई) को सम्पूर्ण तयारी पूरा गरेको छ। परीक्षा यही चैत ७ गतेबाट देशभर एकसाथ सञ्चालन हुने परीक्षा नियन्त्रक नन्दलाल पौडेलले जानकारी दिएका छन्।
यसवर्षको एसईई परीक्षामा विद्यार्थीको संख्या उल्लेख्य रूपमा वृद्धि भएको छ। गतवर्ष २०८० मा ४ लाख ६४ हजार ७८५ जना परीक्षार्थी सहभागी भएका थिए भने यसवर्ष परीक्षार्थी संख्या ४९ हजार २८६ ले वृद्धि भई कुल ५ लाख १४ हजार ७१ पुगेको छ।
परीक्षा केन्द्र र व्यवस्थापन
देशभर २ हजार ७९ परीक्षा केन्द्र तोकिएको छ। एक परीक्षा केन्द्रमा १५० भन्दा बढी परीक्षार्थी भएमा सहायक केन्द्राध्यक्ष रहनेछन् भने प्रत्येक २० विद्यार्थीका लागि एक जना निरीक्षक खटाइने व्यवस्था गरिएको छ। ७५ जनाभन्दा कम परीक्षार्थी भएका केन्द्रमा सहायक केन्द्राध्यक्ष रहने छैनन्।
यसवर्षको एसईई परीक्षा कारागार र बाल सुधार गृहबाट समेत सञ्चालन गरिने भएको छ। काठमाडौँ र दैलेखका दुई कारागार तथा भक्तपुरको बाल सुधार गृहबाट विद्यार्थीहरूले परीक्षा दिनेछन्।
एचआईभी संक्रमित विद्यार्थीको सहभागिता
यसवर्ष कीर्तिपुरस्थित सफलता एचआईभी शिक्षा सदनबाट चार जना एचआईभी संक्रमित विद्यार्थीले एसईई परीक्षा दिनेछन्। यसले शिक्षा सबैका लागि भन्ने सन्देश प्रवाह गरेको छ।
परीक्षा तालिका
चैत ७ गते बिहान ८ बजेबाट परीक्षा सुरु हुनेछ। पहिलो दिन अनिवार्य अंग्रेजी, संस्कृत वेदविद्याश्रमतर्फ अनिवार्य संस्कृत, र मदरसातर्फ अनिवार्य अरबी भाषाको परीक्षा हुनेछ। चैत ८ गते अनिवार्य नेपाली तथा गैरनेपाली विद्यार्थीका लागि वैकल्पिक अंग्रेजी (इलेक्टिभ इङलिस) को परीक्षा हुनेछ। अन्य विषयको परीक्षा चैत १९ गतेसम्म सञ्चालन हुनेछ।
उत्तीर्ण दर वृद्धि गर्ने लक्ष्य
यसवर्ष पनि परीक्षा नतिजा लेटर ग्रेडिङ प्रणालीअनुसार सार्वजनिक गरिने छ। परीक्षा नियन्त्रण कार्यालयले उत्तीर्ण दर ७० प्रतिशत पुर्याउने लक्ष्य लिएको छ। गतवर्ष २०८० को एसईई परीक्षामा मात्र ४८ प्रतिशत विद्यार्थी पास भएका थिए।
