सिरहाको मिर्चैयामा गरिएको अनुगमनका क्रममा १४ वटा निजी स्वास्थ्य संस्थामध्ये १३ वटा अवैध रूपमा सञ्चालनमा रहेको पाइएको छ। शनिबार मधेश प्रदेशका मुख्यमन्त्री सतिशकुमार सिँहको नेतृत्वमा गरिएको अनुगमनपछि ती स्वास्थ्य संस्थाहरूलाई बन्द गराइएको हो।
बन्द गरिएका स्वास्थ्य संस्थाहरूमा सिमित माउन्ट हस्पिटल प्रालि, एस जेके पोलिक्लिनिक, मंगलम हेल्थ केयर सेन्टर, सिद्धकामना हस्पिटल प्रालि, शान्ति हेल्थ केयर प्रालि, बाल संसार हेल्थ केयर प्रालि, राम ओरल एण्ड डेन्टल क्लिनिक, रेखा नर्सिङ होम, मिथिला चश्माघर आँखा उपचार केन्द्र, बालकल्याण हेल्थ केयर प्रालि, विष्णु पोलिक्लिनिक, लक्ष्मी हेल्थ केयर प्रालि तथा लाइफलाइन क्लिनिक रहेका छन्।
यसैबीच, १५ शय्याको सेवा सञ्चालन अनुमति लिएको मनकामना मिड इस्टर्न अस्पतालले मापदण्ड पूरा नगरी २५ भन्दा बढी शय्याको सेवा सञ्चालन गरिरहेको पाइएको छ। अनुगमन टोलीले सो अस्पताललाई १५ दिनभित्र मापदण्डअनुसार सेवा सञ्चालन गर्न निर्देशन दिएको छ। जनस्वास्थ्य अधिकृत सन्तोषकुमार ठाकुरका अनुसार उक्त अस्पतालमा आधारभूत स्वास्थ्य सेवा, एनेस्थेसिया विशेषज्ञ तथा भेन्टिलेटर सुविधा समेत नभएको पाइएको छ।
अनुगमन टोली पुगेका बेला सिद्धकामना हस्पिटल प्रालिका सञ्चालक, चिकित्सक, स्वास्थ्यकर्मी तथा कर्मचारीहरूले अस्पतालमा उपचार गराइरहेका आठ बिरामी तथा कुरुवालाई भित्रै छोडेर अस्पताल बन्द गरी फरार भएका थिए। सोही अस्पतालका दुईजनालाई प्रहरीले नियन्त्रणमा लिएको छ।
मुख्यमन्त्रीका प्रेस सल्लाहकार अनिलकुमार कर्णका अनुसार टोली अनुगमनका लागि पुगेकै समयमा स्वास्थ्य सेवा सञ्चालन अनुमति नलिएका आठ अस्पताल तथा पोलिक्लिनिकका सञ्चालकहरू फरार भएका थिए।
मुख्यमन्त्री सिँहले हालसम्म १५७ वटा निजी स्वास्थ्य संस्थाहरूको अनुगमन गरिसकेका छन्। तीमध्ये १७ वटा मात्र मापदण्डअनुसार सञ्चालनमा रहेको पाइएको छ। मापदण्ड पूरा नगरेका १०८ स्वास्थ्य संस्था बन्द गरिएका छन् भने नवीकरण नगराएका २५ अस्पताललाई नवीकरण गर्न निर्देशन दिइएको छ।
