"हामीलाई ठूला खेल र ठूला अवसरहरूको लागि गाब्रिएल चाहिन्छ।" आर्सनलका मिडफिल्डर डेक्लान राइसको यो भनाइले क्लबका डिफेन्डर गाब्रिएलको महत्वलाई झल्काउँछ।
रियल मड्रिडविरुद्धको च्याम्पियन्स लिग क्वार्टर-फाइनल खेलको तयारी गरिरहेको आर्सनलका लागि गाब्रिएलको घाइते हुनु ठूलो झट्का सावित हुन सक्छ। शनिबार फुलह्यामविरुद्ध २-१ को जित निकाल्ने क्रममा ब्राजिली डिफेन्डर गाब्रिएलले ह्यामस्ट्रिङ चोट बोकेका थिए। प्रशिक्षक मिकेल आर्टेटाका लागि यो झनै चिन्ताको विषय बनेको छ, किनभने यसअघि नै आर्सनलले प्रमुख खेलाडीहरूलाई चोटका कारण गुमाइसकेको छ।
गाब्रिएलको घाइते हुनु मात्र होइन, सोही खेलमा जुरिएन टिम्बर पनि घाइते भएपछि आर्सनलको डिफेन्स थप कमजोर देखिएको छ। यसअघि नै बेन ह्वाइट र रिकार्डो कलाफियोरी पनि घाइते भएर टिम बाहिर छन्।
तर, अर्कोतर्फ आर्सनलका लागि केही राहतको कुरा भनेको बुकायो साकाको मैदान फर्किनु रह्यो। साकाले ७३ औं मिनेटमा गोल गर्दै आफ्नो टोलीलाई जित दिलाए। लामो समय चोटका कारण टाढा रहेका साका फर्केपछि समर्थकहरू निकै खुसी देखिए। प्रशिक्षक आर्टेटाले पनि साकाको महत्त्वबारे प्रकाश पार्दै भने, "उनले खेल जिताउन मात्र होइन, हाम्रो सम्पूर्ण टोलीलाई ऊर्जा दिन्छन्।"
चोटकै कारण सिजनभर संघर्षरत आर्सनलले इंग्लिस प्रिमियर लिग उपाधि होडमा पछि पर्नु परेको छ। साका घाइते हुनु अघि प्रिमियर लिगमा आर्सनलले १६ खेलमा ३४ गोल गरेको थियो भने, उनको अनुपस्थितिमा १३ खेलमा मात्र १९ गोल गर्न सफल भयो।
अब सबैको ध्यान च्याम्पियन्स लिगतर्फ केन्द्रित छ। रियल मड्रिडविरुद्धको खेलमा साकाले आफ्नो प्रभाव देखाउने अपेक्षा गरिएको छ भने, गाब्रिएल मैदान फर्कन सक्छन् कि सक्दैनन् भन्ने अझै अन्योलमै छ। प्रशिक्षक आर्टेटाले भने, "हामीसँग खेलाडीहरूको चोटका कारण धेरै चुनौतीहरू छन्। तर, हामीले यसलाई पार गर्नुपर्छ।"
आगामी मङ्गलबार रियल मड्रिडविरुद्धको पहिलो लेग खेल्न जाँदा आर्सनल आफ्नो महत्वपूर्ण खेलाडीहरूको अनुपस्थितिलाई कसरी सम्हाल्नेछ भन्ने चासो सबैलाई छ।
