वीरगञ्ज सुक्खा बन्दरगाहको व्यवस्थापन तथा सञ्चालन पुनः साविककै भारतीय कम्पनी प्रिस्टिन मेगा लजिस्टिक पार्क प्रालिले पाएको छ। नेपाल इन्टरमोडल यातायात विकास समितिले आगामी पाँच वर्षका लागि बन्दरगाह सञ्चालन तथा व्यवस्थापनको जिम्मा सोही कम्पनीलाई दिएको हो।
यस पटकको ठेक्का प्रतिस्पर्धात्मक बोलपत्र प्रक्रियाबाट गरिएको थियो, जसमा प्रिस्टिन मेगा लजिस्टिक पार्कले ४ अर्ब ७१ करोड रुपैयाँ कबोल गरेको थियो। यो भन्दा कम रकम कबोल गर्ने कन्टेनर कर्पोरसन अफ इन्डिया (४ अर्ब ५० करोड ९० लाख) अन्तिम प्रतिस्पर्धामा पराजित भएको समितिका कार्यकारी निर्देशक आशिष गजुरेलले जानकारी दिए।
निजी क्षेत्रको संलग्नताले सेवा तथा आम्दानी वृद्धि
समितिका अनुसार निजी क्षेत्रमार्फत सुक्खा बन्दरगाह सञ्चालन गर्दा सेवाको स्तर मात्र नभई आम्दानी समेत वृद्धि भएको छ। कार्यकारी निर्देशक गजुरेलका अनुसार बन्दरगाहको व्यवस्थापन निजी कम्पनीलाई दिँदा राज्यलाई आर्थिक रूपमा समेत फाइदा पुगेको छ।
"निजी क्षेत्रको सहभागिताले पोर्टहरूको सेवा स्तरीय भएको छ भने आम्दानी समेत बढेको छ। यसले नेपालको अन्तर्राष्ट्रिय व्यापारलाई सहज बनाएको छ," उनले भने।
५ वर्षअघि भन्दा उच्च लागतमा सम्झौता
यसअघि यही कम्पनीले पाँच वर्षका लागि ३ अर्ब ३३ करोड रुपैयाँमा बन्दरगाह सञ्चालन तथा व्यवस्थापनको जिम्मा लिएको थियो। यस पटक भने सोही सेवा थप १ अर्ब ३८ करोड रुपैयाँ बढी लागतमा सम्झौता भएको छ।
वीरगञ्ज सुक्खा बन्दरगाह भारतसँग रेलमार्गद्वारा जोडिएको नेपालको प्रमुख व्यापारिक नाका हो। यहाँ कार्गो रेलमार्फत मात्र मालसामान आयात तथा निर्यात हुने गर्छ। सन् २००४ देखि सञ्चालनमा रहेको यो बन्दरगाह नेपाल-भारत व्यापारको महत्त्वपूर्ण केन्द्रका रूपमा रहँदै आएको छ।
