नेपाल सुपर लिग (एनएसएल) २०२५ अन्तर्गत आज साविक विजेता ललितपुर सिटी एफसी र पोखरा थण्डर्स बीच प्रतिस्पर्धा हुँदैछ। खेल त्रिपुरेश्वरस्थित दशरथ रंगशालामा साँझ ६ बजे सुरु हुनेछ। दुवै टोलीले आफ्नो पहिलो जित निकाल्ने लक्ष्य राखेका छन्। ललितपुरले उद्घाटन खेलमा काठमाडौं रेजर्ससँग २-२ को बराबरी खेल्दै अंक बाँडेका थिए भने पोखरा आफ्नो पहिलो खेलमा एफसी चितवनसँग २-० को हार भोगेको थियो।
ललितपुरको टोली पहिलो खेलमा जित नजिक पुगेर पनि इन्जुरी टाइममा पेनाल्टीमा गोल खाँदा अंक बाँड्न बाध्य भएको थियो। टीममा विदेशी र नेपाली खेलाडीहरूको राम्रो मिश्रण रहेको ललितपुर आज जितको लक्ष्यमा उत्रनेछ। ललितपुरका कप्तान अनन्त तामाङ र सनिश श्रेष्ठ जस्ता राष्ट्रिय टोलीका खेलाडीले टोलीलाई मजबुत बनाएका छन्। साथै, विदेशी खेलाडीहरूको अनुभव पनि टोलीलाई बलियो बनाउँछ। गोलकिपर जेफ्री बाल्टस, डिफेन्डर पेपे डिएकेटे, मिडफिल्डर जोनाथान कान्टिलाना, र फरवार्ड इमोह इवेकेल जस्ता अन्तर्राष्ट्रिय खेलाडीहरूले ललितपुरको खेललाई अझ प्रभावशाली बनाएका छन्।
पोखरा थण्डर्सले एक दिनको छोटो विश्रामपछि ललितपुरसँग प्रतिस्पर्धा गर्दैछ। पोखराका कप्तान नवयुग श्रेष्ठ र राष्ट्रिय टोलीका आयुष घलान खेलमा प्रभावकारी बन्ने प्रयासमा छन्। यद्यपि, पोखराका समिर तामाङ पहिलो खेलमा घाइते भएर मैदान छोडेका थिए, तर प्रशिक्षक सुमन श्रेष्ठ ले उनको चोट ठूलो नभएको र चाँडै फर्कने विश्वास व्यक्त गरेका छन्। पोखरामा विदेशी गोलकिपर प्रिसो, जोए आएडु, माइकल चुक्वबुन्ना, र स्टेफेन समिर विनोङ जस्ता खेलाडीहरू पनि छन्।
आजको खेल दुबै टोलीका लागि महत्त्वपूर्ण हुनेछ, जसले आफ्नो लिग अभियानलाई सशक्त सुरुवात दिन सक्छ। ललितपुर र पोखरा दुबै टोलीको पहिलो जितको खोजीमा रहेका छन्, र यो खेलले उनीहरूको आगामी प्रतिस्पर्धामा प्रभाव पार्न सक्छ।
