नेपाल क्लियरिङ हाउस (एनसीएचएल) ले डिजिटल भुक्तानी प्रणालीलाई थप सुलभ बनाउने उद्देश्यसहित साना कारोबारमा लाग्ने शुल्क घटाएको छ। अब मोबाइल बैंकिङ, वालेट तथा कनेक्ट आईपीएसमार्फत ५ सय रुपैयाँसम्मको रकम ट्रान्सफर गर्दा कुनै शुल्क लाग्ने छैन।
एनसीएचएलले रिटेल पेमेन्ट स्विच (आरपीएस) प्रणालीअन्तर्गत लागू हुने शुल्क संरचना परिमार्जन गर्दै नयाँ दर सार्वजनिक गरेको हो। यसअनुसार, मोबाइल बैंकिङ एप, कनेक्ट आईपीएसको वेबसाइट वा मोबाइल एप तथा वालेटमार्फत ५ सय रुपैयाँसम्मको कारोबार गर्दा निःशुल्क हुनेछ। ५ सयदेखि ५ हजार रुपैयाँसम्म ट्रान्सफर गर्दा ४ रुपैयाँ शुल्क लाग्नेछ भने ५ हजारभन्दा माथि ८ रुपैयाँ शुल्क लाग्ने व्यवस्था गरिएको छ।
मर्चेन्ट भुक्तानीमा पनि नयाँ शुल्क प्रणाली लागू गरिएको छ। ५ सय रुपैयाँसम्मको भुक्तानीमा २ रुपैयाँ, ५ सयदेखि ५ हजार रुपैयाँसम्मको भुक्तानीमा ४ रुपैयाँ तथा ५ हजारभन्दा माथिको भुक्तानीमा ८ रुपैयाँ शुल्क लाग्नेछ। यद्यपि, सेवा प्रदायक वा मर्चेन्टले शुल्क बेहोरेको अवस्थामा ग्राहकलाई कुनै शुल्क तिर्नु पर्ने छैन।
एनसीएचएलले डिजिटल भुक्तानीको प्रवर्द्धन गर्दै कारोबार शुल्कलाई क्रमशः समायोजन गर्ने नीति लिएको छ। आरपीएस प्रणालीमार्फत गत आर्थिक वर्ष ५ हजार ६ सय ९७ अर्ब बराबरको ७ करोड ५६ लाख भुक्तानी कारोबार फर्छ्योट गरिएको थियो भने चालू आर्थिक वर्षको ८ महिनामा मात्र ४ हजार ५ सय ५३ अर्ब बराबरको ६ करोड ८३ लाख कारोबार फर्छ्योट भइसकेको छ।
हाल, ५२ वटा बैंक तथा वित्तीय संस्थाका मोबाइल बैंकिङ एप तथा १३ भन्दा बढी वालेटमार्फत बैंक खाताबाट क्यास इन र क्यास आउट सुविधा उपलब्ध रहेको एनसीएचएलले जनाएको छ।
