निजी क्षेत्रका समस्या समाधानमा सरकारको निरन्तर उदासीनता रहेको गुनासो व्यवसायीहरूले व्यक्त गरेका छन्। वीरगञ्ज उद्योग वाणिज्य संघका नवनिर्वाचित पदाधिकारीहरूको सपथग्रहण समारोहमा सहभागी वक्ताहरूले सरकारको नीतिगत असहयोगले औद्योगिक तथा व्यापारिक गतिविधिमा प्रतिकूल असर पारेको बताए।
संघका अध्यक्ष हरि गौतमले बारा–पर्सा औद्योगिक कोरिडोरको घोषणा, व्यापार सहजीकरण, आयात-निर्यातका अवरोध तथा कर प्रणालीमा सुधारजस्ता मागहरू लामो समयदेखि उठाइरहे पनि सरकार ती विषयमा संवेदनशील नभएको बताए। उनले निजी क्षेत्रको समस्यालाई प्राथमिकतामा राखेर सम्बोधन गरिनुपर्नेमा जोड दिए।
नेपाल उद्योग वाणिज्य महासंघ व्यापार समितिका सभापति सुबोधकुमार गुप्ताले अर्थतन्त्र हाल संकटग्रस्त अवस्थामा रहेको भन्दै सरकारलाई व्यापारमैत्री वातावरण सिर्जना गर्न आग्रह गरे।
संघका पूर्वअध्यक्ष बाबुलाल चाचानले निजी क्षेत्रको आत्मविश्वास घट्दै गएको उल्लेख गर्दै सरकारले सहयोग नगरे अर्थतन्त्र थप जटिल बन्न सक्ने चेतावनी दिए। उद्योग तथा व्यापारको प्रवर्द्धनमा सरकारको सक्रियता आवश्यक रहेको उनको भनाइ थियो।
नेपाल पत्रकार महासंघ, मधेश प्रदेशका अध्यक्ष श्याम बन्जारा, संघका पूर्वअध्यक्ष गणेश लाठ तथा संविधानसभा सदस्य ओमप्रकाश शर्माले सरकार र निजी क्षेत्रबीच सहकार्यको खाँचो रहेको औंल्याए।
यसैबीच, वीरगञ्जको मुख्य सडक ५० मिटर फराकिलो पार्ने योजनाबारे पूर्वनगरप्रमुख विजयकुमार सरावगी र संघका पूर्वअध्यक्ष प्रदीप केडियाले व्यावहारिक रूपमा पुनर्विचार गर्नुपर्ने बताए। त्रिभुवनराजपथको विकल्पमा दुवैतर्फ बाइपास सञ्चालनमा आइसकेको तथा मूल राजमार्गको रुट परिवर्तन भएकाले नयाँ योजना बनाइनुपर्ने उनीहरूको धारणा थियो।
निजी क्षेत्रका प्रतिनिधिहरूले सरकारसँग स्पष्ट नीतिगत निर्णयको अपेक्षा राख्दै सहकार्यको वातावरण सिर्जना गर्न आग्रह गरेका छन्।
