ज्ञान्दा एकेडेमी स्कूल, वीरगन्जमा बिहीबार एलकेजी विद्यार्थीहरूको दीक्षान्त समारोह अत्यन्तै भव्यतासाथ सम्पन्न भएको छ। विद्यालयको सभाहलमा आयोजित सो समारोहमा विद्यार्थीहरूलाई प्रमाणपत्र प्रदान गरी उनीहरूको शैक्षिक यात्रा समापन गरिएको हो।
समारोहको उद्घाटन लिटिल बर्ड्स स्कूलका सञ्चालक विजय कुमार बल, एनवाईएफ च्याप्टर वीरगन्जका सदस्य तथा स्मार्ट किड्सका प्रिन्सिपल मनिषा सुनवार श्रेष्ठ, विद्यालयका कार्यकारी निर्देशक राजेन्द्र कोइराला र सह–प्रधानाध्यापिका जागृति मिश्राले संयुक्त रूपमा दीप प्रज्वलन गरी गरेका थिए।
कार्यक्रममा बोल्दै कार्यकारी निर्देशक राजेन्द्र कोइरालाले एलकेजीका विद्यार्थीहरूलाई भविष्यका लागि शुभकामना दिँदै, "तपाईंहरूले बाल्यकालको महत्त्वपूर्ण चरण पार गर्दै शिक्षाको क्षेत्रमा बलियो आधार राख्नुभएको छ।" उनले विद्यालयले शिक्षा मात्र नभई अनुशासन, खेलकुद, स्वास्थ्य र मनोरञ्जनलाई पनि महत्वपूर्ण मान्दै सबै क्षेत्रमा विद्यार्थीलाइ राम्रो शिक्षा प्रदान गर्दै आएको बताए।
सह–प्रधानाध्यापिका जागृति मिश्राले विद्यार्थीहरूलाई विद्यालयको गहना भन्दै, "तपाईंहरूको सफलता हाम्रो लागि गर्वको कुरा हो। यस विशेष दिनलाई सफल बनाउन सहयोग गर्ने सबैलाई धन्यवाद दिन चाहन्छु।"
कार्यक्रमको सञ्चालन शिक्षिका कोपिला शर्मा र पुष्पा क्षेत्रीले गरेका थिए।
यस कार्यक्रमले ज्ञान्दा एकेडेमी स्कूलका एलकेजी विद्यार्थीहरूको शैक्षिक यात्रालाई समापन गर्दै भविष्यमा उनीहरूको उज्ज्वल सफलता र प्रगतिको शुभकामना दिइएको थियो।
