तीनकुने आगजनी घटनामा सुरक्षाकर्मीले उद्धार गर्न चासो नदिएको आरोपलाई सशस्त्र प्रहरी महानिरीक्षक राजु अर्यालले अस्वीकार गरेका छन्। उनले पत्रकार सुरेश रजकको उद्धार प्रयास नगरेको भन्ने कुरा आधारहीन रहेको दाबी गरेका छन्।
राज्य व्यवस्था तथा सुशासन समितिको बैठकमा शुक्रबार सांसदहरूले उठाएको प्रश्नको जवाफ दिँदै महानिरीक्षक अर्यालले घटनास्थलमा सुरक्षाकर्मीको टोलीले दुई पटक खोजी गरेको तर पत्रकारलाई भेट्न नसकेको बताएका हुन्।
“दुई पटक खोज्दा पनि पत्रकार भेटिएनन्”
महानिरीक्षक अर्यालका अनुसार, ३ बजेर ४७ मिनेटमा डीएसपीको नेतृत्वमा सुरक्षाकर्मीको टोली घटनास्थल पुगेको थियो। पहिलो चरणमा तीन तलासम्म खोजी गरिएको तर चौथो तलामा ताला लागेका कारण टोली बाहिरिएको उनले बताए।
‘तल झरेपछि माथि मानिस छ भन्ने जानकारी आयो, त्यसपछि हाम्रो टोली पुनः माथि पुग्यो। तर, त्यहाँ पनि कोही भेटिएन,’ उनले भने। ‘हाम्रो टोली फर्किंदा समेत अवस्था निस्सासिएको थियो।’
सुरक्षाकर्मीमाथि उद्धार नगरेको आरोप
पत्रकार सुरेश रजकलाई बाहिर ल्याउन नसकेको विषयमा सुरक्षाकर्मीको भूमिका प्रश्नमा परेको छ। घरभित्र पत्रकार रहेको भन्दै सञ्चारकर्मीहरू तथा टेलिभिजन व्यवस्थापनले पटकपटक आग्रह गरे पनि उद्धार नगर्दा ज्यान गएको आरोप लागेको छ।
तर, महानिरीक्षक अर्यालले यस्तो आरोप अस्वीकार गर्दै भने, ‘त्रिशूली र नारायणी नदीमा डुबेका शवसमेत निकाल्न सुरक्षाफौजले ज्यान माया मार्छ, जीवित मान्छेलाई उद्धार नगर्ने कुरै आउँदैन।’
गृहमन्त्रीको स्वीकृति: समयमै प्रहरी प्रवेश नगर्दा उद्धार असम्भव
यसअघि सोही बैठकमा गृहमन्त्री रमेश लेखकले समयमै प्रहरी भवनभित्र छिर्न नसक्दा पत्रकार रजकको उद्धार सम्भव नभएको स्वीकार गरेका थिए।
‘राजावादी अगुवाहरूले भिडलाई उक्साएर संसद भवन तोडफोड गर्न उभ्याए। त्यही भिडले निषेधित क्षेत्र तोड्यो र घरमा आगो लगाइयो,’ गृहमन्त्री लेखकले भने। ‘घरभित्र मानिस रहेको जानकारी हुँदाहुँदै आगजनी भयो। आगो नियन्त्रण गर्ने प्रयास भए पनि सुरक्षाकर्मी घाइते भएपछि दमकललाई समेत अवरोध भयो।’
उनका अनुसार, सुरक्षाकर्मीले सकेसम्म प्रयास गरे पनि परिस्थितिले साथ नदिएकाले उद्धार सम्भव भएन।
के थियो तीनकुने घटना ?
१५ चैतमा राजावादी प्रदर्शनको क्रममा तीनकुनेस्थित एक घरमा प्रदर्शनकारीले आगो लगाएपछि एभिन्युज टेलिभिजनका क्यामेरापर्सन सुरेश रजक जलेर मृत्यु भएको थियो। सुरक्षाकर्मी समयमै घटनास्थल प्रवेश नगरेको र उद्धार नगरेको आरोप लगाइएपछि यो विषय संसदमा समेत बहसको केन्द्र बनेको छ।
