तीनकुनेमा चैत १५ गते राजसंस्थाको समर्थनमा गरिएको प्रदर्शनका मुख्य आयोजक तथा ‘जनआन्दोलन समिति’ का स्वयं घोषित जनकमाण्डर दुर्गा प्रसाईंलाई काठमाडौं जिल्ला अदालतले १२ दिन हिरासतमा राखेर अनुसन्धान गर्न अनुमति दिएको छ।
जिल्ला अदालत काठमाडौंका न्यायाधीश शिशिरराज ढकालको एकल इजलासले शुक्रबार दिएको आदेशअनुसार प्रसाईंलाई हिरासतमा राखेर थप अनुसन्धान गर्न प्रहरीले कानुनी आधार पाएको हो।
बडिगार्ड दीपक खड्कालाई पनि १२ दिनको म्याद
प्रसाईंसँगै पक्राउ परेका उनका बडिगार्ड दीपक खड्कालाई समेत १२ दिन हिरासतमा राख्न अदालतले अनुमति दिएको छ। प्रहरी स्रोतका अनुसार, दुवैलाई हिरासतमा राखेर प्रदर्शनसँग सम्बन्धित गतिविधि, हिंसात्मक घटना र पूर्वराजाको संलग्नता जस्ता विषयमा अनुसन्धान अघि बढाइनेछ।
राप्रपा नेताहरूको हिरासत म्यादसँग मिलान
यसअघि, सोही प्रदर्शनमा संलग्न रहेको आरोपमा पक्राउ परेका राप्रपाका नेताहरू रविन्द्र मिश्र र धवलशमशेर जबरालाई १५ दिनको हिरासतमा राख्न म्याद थपिएको थियो। प्रसाईं र खड्काको हिरासत अवधि पनि उनीहरूसँग मिलान गर्नका लागि प्रहरीले १२ दिनको म्याद माग गरेको थियो।
भारतबाट पक्राउ, आजै काठमाडौं ल्याइयो
प्रसाईंलाई नेपाल प्रहरीले भारतको असामबाट नेपाल फर्किएलगत्तै झापाको काकडभिट्टाबाट पक्राउ गरी शुक्रबार नै काठमाडौं ल्याएको हो। पक्राउपछि उनलाई सोधपुछका लागि जिल्ला प्रहरी परिसर, काठमाडौंमा राखिएको छ।
यस घटनाले राजसंस्था पुनःस्थापनाका नाममा भइरहेको आन्दोलनको स्वरूप, नेतृत्व र उद्देश्यबारे थप बहस उत्पन्न गरेको छ। प्रहरी प्रशासनले अब घटनाको सम्पूर्ण पृष्ठभूमि खोतल्ने तयारी गरेको जनाएको छ।
-1744525630.jpg)
-1744525630.jpg)
