वीरगञ्जको सामाजिक, साँस्कृतिक र व्यापारिक जीवनलाई आत्मीयतापूर्वक उतारिएको संस्मरणात्मक कृति ‘सीमान्त सम्झना’ सार्वजनिक गरिएको छ। व्यवसायी तथा साहित्यकार गणेशप्रसाद लाठद्वारा लिखित यस कृति मार्फत लेखकले आफ्नो जीवन र समयको यात्रालाई पाठकसमक्ष चित्रमय शैलीमा प्रस्तुत गरेका छन्।
शनिबार काठमाडौंमा आयोजित लोकार्पण समारोहमा लेखकहरू यादव भट्टराई, मोहन मैनाली, अदिती शाह र स्वयं कृतिकार लाठले संयुक्त रूपमा पुस्तक सार्वजनिक गरे।
'चित्रवत् संस्मरण' को शैली
कार्यक्रममा बोल्दै लेखक यादव देवकोटाले ‘सीमान्त सम्झना’ लाई “चित्रवत् संस्मरण” को रूपमा व्याख्या गरे। उनले भने, “यो पुस्तकमा वीरगञ्जको कथा केवल लेखकको दृष्टिमा सीमित छैन, यसमा थुप्रै पात्र र समयको आवाज समेटिएको छ।”
उनका अनुसार पुस्तकले वीरगञ्जको ऐतिहासिक, सांस्कृतिक र पारिवारिक सेरोफेरोलाई सजीव भाषामा समेटेको छ, जसले त्यो भूगोललाई नजिकबाट चिन्नेहरूका लागि मात्र होइन, नयाँ पुस्तालाई पनि गहिरो अनुभूति दिन सक्छ।
लेखकको आत्मदृष्टि
लेखक गणेशप्रसाद लाठले आफूले भोगेका, देखेका र महसुस गरेका पलहरूलाई शब्दमा बाँध्ने प्रयास गरेको बताए। उनले भने, “यो केवल मेरो जीवनकथा होइन, मेरो पुस्ताको यात्रा हो। आगामी पुस्ताले अतीतलाई बुझ्न यो पुस्तक सन्दर्भ बन्न सकोस् भन्ने आशा गरेको छु।”
प्रकाशन र बजार उपस्थिति
पब्लिकेसन नेपालयले बजारमा ल्याएको कृति ‘सीमान्त सम्झना’ले संस्मरण साहित्यमा अर्को स्वाद थप्ने विश्वास गरिएको छ। निजी अनुभव, सामाजिक पृष्ठभूमि र क्षेत्रीय संवेदनशीलता समेटिएको यो पुस्तकले पाठकहरूलाई नयाँ अनुभूतिको स्वाद दिने अपेक्षा गरिएको छ।
-1744525630.jpg)
