त्रिभुवन विश्वविद्यालय (त्रिवि)ले विद्यार्थीहरूको दीर्घ अपेक्षा पूरा गर्दै ट्रान्सक्रिप्ट र प्रोभिजनल सर्टिफिकेट अनलाइनमार्फत उपलब्ध गराउन थालेको छ। आज (सोमबार) बिहान ११ बजेदेखि यो सेवा औपचारिक रूपमा सुरु गरिएको हो।
परीक्षा नियन्त्रक पुष्पराज जोशीका अनुसार, अब विद्यार्थीहरूले बल्खुस्थित परीक्षा नियन्त्रण कार्यालय जानुपर्ने झन्झटबाट मुक्ति पाउनेछन्। जोशी भन्छन्, “अबदेखि विद्यार्थीहरूले आफ्नो मोबाइल वा कम्प्युटरबाटै फारम भरी, शुल्क तिरेर सेवा लिन सक्नेछन्।”
छोटो लाइन होइन, अनलाइन
वर्षौंदेखि विद्यार्थीहरू बल्खुमा फारम बुझाउन घण्टौँ लाइन बस्न बाध्य थिए। तर, अब student.tuexam.edu.np मा लगइन गरी फारम भर्ने, बैंकमार्फत अनलाइन भुक्तानी गर्ने र फारम सबमिट गर्ने प्रक्रिया घरमै बसेर गर्न सकिनेछ।
प्रारम्भिक चरणमा ट्रान्सक्रिप्ट र प्रोभिजनल सर्टिफिकेटको मात्र सेवा अनलाइनमार्फत दिइए पनि, जोशीका अनुसार आगामी जेठ १५ गतेदेखि परीक्षा नियन्त्रण कार्यालयबाट प्रदान गरिने सम्पूर्ण सेवा अनलाइनमार्फत सञ्चालन गरिनेछ।
एकरूपता नभए सच्याएर फारम बुझाउन सकिने
फारम भर्दा विद्यार्थीका रजिष्ट्रेसन कार्ड र मार्कसिटमा उल्लेख विवरण एकरूप हुनुपर्नेछ। विवरण फरक परेमा, “करेक्सन अप्सन” मा गई सच्याएर फारम सबमिट गर्न सकिने व्यवस्था गरिएको छ।
डिजिटल युगतर्फ त्रिविको सार्थक पाइला
त्रिविको यो कदमलाई शिक्षा प्रणालीमा डिजिटल परिवर्तनको थालनीको रूपमा हेरिएको छ। प्रविधि र सेवा सहजताको संयोजनले विद्यार्थीहरूलाई राहत दिने मात्र होइन, कार्यकुशलता पनि बढाउने विश्वास गरिएको छ।
